BOBONARO, 15 setembru 2022 (TATOLI) — Bee Timor-Leste, Empreza Públika (BTL, E.P) munisípiu Bobonaro, sei dezliga mákina elétrika bomba bee iha kapitál Maliana tanba sein autorizasaun.
Diretór BTL munisípiu Bobonaro, Adriano da Cruz, fó-sai katak, iha tempu badak tékniku sira sei dezliga bomba elétrika bee ho marka Sanyo ilegál hamutuk unidade 10 iha kapitál Maliana.
Notísia relevante: Sistema gravitasaun Bere-Mau sei funsiona iha semana oin
“Ha’u hanoin iha tempu badak sei ha halo fiskalizasaun hodi retira tiha sistema ligasaun ilegál sira. Ita deskonfia ema uza bomba elétrika karik, agora ita deteta tiha ona iha unidade 10-resin, ita sei hasai hotu kedas,” nia informa ba Jornalista sira, iha kna’ar-fatin, Soso, Maliana, kinta ne’e.
Hafoin hasai bomba hirak-ne’e sei lori hotu ba edifísiu BTL, Soso, Maliana hodi bolu na’in ba mákina ne’e presta deklarasaun, no kontinua ba prosesu halo destroisaun hamutuk ho entidade kompetente sira.
Adriano esplika, durante ne’e BTL sosializa regra utillzasaun bee iha nível munisípiu no tuir planu iha fulan-outubru kontinua implementa iha postu administrativu sira iha zona abastesimentu bee sira nune’e konsiensializa komunidade sira evita halo ligasaun ilegál.
“Agora ne’e ita sei tama iha etapa ida konsiensializasaun, la’o neineik. Ne’e duni sira- ne’ebé ulun to’os viola hela ita sei foti medida rigorozu hodi selu multa iha banku liuhosi resibu ne’ebé mak sei prodús hosi BTL,” nia akresenta.
Tuir nia, bee nu’udar nesesidade bázika tanba ne’e bainhira operadór sira dezliga dalaruma komunidade sira sobu fila-fali uza xave sira ne’ebé sosa iha loja sira.
Sé situasaun ne’e akontese iha sosiedade, nia husu aprezenta keixa ka lamentasaun ba edifísiu BTL nune’e tékniku sira halo intervensaun.
Notísia relevante: BTL,EP Bobonaro sei mellora sistema bee-moos ho kualidade
Jornalista : Sérgio da Cruz
Editór : Evaristo Soares Martins
