DILI, 19 Juñu 2026 (TATOLI )–Ministru Interiór, Francisco da Costa Guterres, apresia no kongratula ba membru Polísia Nasionál Timor-Leste (PNTL) nia serbisu ne’ebé rekolla informasaun no konsege halo atuasaun rápida hodi prevene atividade roubu ne’ebé durante ne’e akontese iha kapitál Dili.
“Sira-nia serbisu durante ne’e la’o di’ak, kazu foin mak akontese de’it sira asegura kedas, ha’u bele dehan momentu akontese kazu joven feto ida mate iha Pantai Kelapa ne’ebá, loron ne’e duni sira kaer uluk ona suspeitu na’in-rua ona, ne’ebé mak iha ligasaun ho kazu naok ka hadau ema-nia karteira inklui telfone. Tanba ne’e, ha’u apresia ita-nia serbisu informasaun sira no presiza valoriza ekipa servisu sekreta sira,” Ministru hateten ba Jornalista sira bainhira partisipa iha reuniaun ordinária Konsellu Ministru iha edifísiu Ministériu Finansa, Aitarak-laran, Sesta ne’e.
Notísia relevante : Tribunál aplika Prizaun Preventiva ba arguidu na’in-rua hadau karteira iha Praia dos Coqueiros
Nia dehan, ekipa Servisu Informasaun durante ne’e serbisu nonok no di’ak.
“Ha’u hatene saida mak sira halo ne’e, ita kontinua valoriza nafatin sira-nia serbisu. Ita agradese nafatin sira, valoriza nafatin sira mas la presiza ko’alia tanba preokupasaun mak ne’e sira ne’e ema labele koñese sira atu nune’e sira kontinua la’o nafatin. Tanba ne’e mak ami labele ko’alia buat ruma ba sira,” nia akresenta.
Ministru hatutan: “Komandu orbainhira ha’u fó ona informasaun, kuaze ekipa sekreta sira atu loke sai hotu ona rede robu. Rede ida-ne’e servisu informasaun sira konsege sobu ona, sei falta balun sira sei kontinua buka tuir nafatin rede sira ne’e.”
Biban ne’e, Governante ne’e apela nafatin ba komunidade, mídia, no joven sira hotu katak lalika envolve ba rede sira tanba bele estraga futuru.
“Apela ba komunidade hotu sé rona informasaun ruma halo favór informa lalais ba Polísia para depois Polísia bele uza ninia mekanizmu no meiu ne’ebé mak iha atu buka tuir para hodi bele tesi rede sira ne’e atu labele fó prejuizu ba joven no komunidade,” nia tenik.
Jornalista : Natalino Costa
Editora : Julia Chatarina
