OÉ-CUSSE, 05 outubru 2023 (TATOLI – Prezidente Autoridade Rejiaun Administrativa Espesiál Oé-Cusse (RAEOA), Arsénio Paixão Bano, informa, durante mandatu tinan tolu hahú simu pose iha 2020 to’o 2023 ne’e, Autoridade rekolla ona reseita ba kofre Estadu hamutuk millaun $9.
Notísia relevante: Hahú hosi 2015-2023, RAEOA rekolla reseita millaun $46-resin
Arsénio Paixão Bano, relata asuntu ne’e, bainhira hala’o entrevista eskluziva iha estúdiu Agência Tatoli, IP, iha Farol, Dili kuarta ne’e.
“Ita-nia reseita ne’e sei dook tanba ita tenki prodús barak, ita haree katak, ita-nia reseita ne’e bele tama, ita agora ne’e gasta mak barak, mezmu ita halo kolesaun reseita ne’e uitoan, hanesan iha tinan tolu nia laran, ita rekolla millaun $9, reseita ne’e mai hosi aviaun, uma sira-ne’ebé maka ita fó aluga, hosi importasaun tama ba Oé-Cusse, ho sasán sira seluk inklui saláriu sira,” Arsénio Bano fó-sai.
Tuir nia, bainhira atu ko’alia ba reseita, presiza servisu barak, prepara kondisaun ba futuru, aeroportu sira bele halo reseita ho infraestrutura sira-ne’ebé mak harii ona bele halo reseita.
“Maibé ida-ne’e sei haan tempu, ita mós presiza aumenta tán esforsu ba turizmu, liuliu la’ós iha servisu sentrál de’it, entaun ha’u dehan, tinan tolu ne’e reseita mak ha’u informa ne’e, millaun $9 hosi despeza millaun $135 ne’e, ida-ne’e ba ha’u-nia mandatu tinan tolu,” nia afirma.
Notísia relevante: Implementasaun ZEESM kontribui ba mudansa liña pobreza iha RAEOA
Jornalista: Abílio Elo Nini
Editór: Evaristo Soares Martins
