DILI, 19 agostu 2020 (TATOLI)-Governu Korea du Sul liuhusi nia embaixada iha Timor-Leste, ohin, fó doasaun laptop (ho modelu Samsung) 10 no printer HP LaserJet ida (1) ba Sekretária Estadu Protesaun Sivíl (SEPS).
Ekipamentu hirak ne’e entrega diretamente husi Embaixadór Korea iha Timor-Leste Lee Ching Bun ba Sekretáriu Estadu Protesaun Sivíl, Joaquim Gusmão ne’ebé akompaña mós husi kargu diresaun SEPS iha edifísiu SEPS, Caicoli, Dili.
Joaquin Gusmão lori Governu nia naran agradese ba Governu Korea bele apoiu ona ekipamentu hirak ne’e no SEPS distribui kedas laptop sira-ne’e ba iha Diresaun Nasionál Prevensaun Konflitu Komunitáriu hodi fasilita servisu sira ho di’ak liután.
Nia husu funsionáriu sira atu utiliza ho kuidadu hodi hala’o servisu ba interese Estadu nian.
Embaixadór Lee Ching Bun kongratula Sekretáriu Estadu Joaquin Gusmão ne’ebé hetan nomeasaun foun lidera SEPS.
SEPS ho Embaixadór Lee Ching Bun, ko’alia mós kooperasaun estratéjiku no haree oportunidade apoiu husi Governu Korea nian mai SEPS.
SEPS Joaquim Gusmão partilla mós ba Embaixadór Lee Ching Bun, kona-ba lei protesaun sivíl ne’ebé hetan ona aprovasaun husi Parlamentu Nasionál no haruka ona ba Prezidente Repúblika atu promulga hodi bele dezenvolve di’ak liután area protesaun sivíl iha Timor-Leste
Jornalista : Nelson de Sousa
Editór : Francisco Simões
