DILI, 13 Marsu 2026 (TATOLI)—Prezidente Emerge Foundation Austrália Limited, Ian Mac Ritchie, akompañadu husi Ministra Edukasaun, Dulce de Jesus, hala’o enkontru ho Primeiru-Ministru, Kay Rala Xanana Gusmão, hodi atualiza programa bolsa estudu ba timoroan sira iha área edukasaun no iha saúde.
Prezidente Emerge Foundation Austrália Limited, Ian Mac Ritchie, hateten objetivu fó bolsa estudu ba joven feto no mane sira, atu kontinua estudu iha iuniversidade Emerge Foundatiom iha Austrália hodi sai manorin no enfarmajen.
“Ami mós envolvidu iha klinika privadu sira-ne’ebé estabelese iha Timor no ohin ami hetan oportunidade atu hasoru malu ho Primeiru Ministru, ha’u-nia kolega Xanana Gusmão, ne’ebé ami respeita tebes nia. Tanba, nia hanesan péritu Nelson Mandela ba Timor, nia nunka lakon hanoin atu hetan independénsia ba nia rai rasik,” Dirijente Emerge Foundation Austrália ne’e relata ba jornalista sira iha Palásiu Governu, ohin.
Tanba ne’e, nia dehan, sira kontente tebes atu apoiu Timor-Leste liuhusi bolsa estudu hodi kapasita ninia rekursu umanu liuliu jerasaun foun sira, tanba tuir péritu Nelson Mandela dehan “Edukasaun mak armjen boot liu atu muda mundu”.
“Entaun, ami-nia pozisaun mak fó apoiu edukasaun iha Timor. Emerge Foundation Australia, kontinua buka fundu hodi fó bolsa estudu ba joven sira, atu sira bele iha oportunidade kontinua estudu iha Institutu Sentru Formasaun Profesór (ICFP) iha Barker no ami sei selesiona rekursu poténsia iha munisípiu hotu-hotu,” nia dehan.
Jornalista : Alexandra da Costa
Editór : Cancio Ximenes
