BOBONARU, 05 Marsu 2026 (TATOLI)-Diresaun Servisu Edukasaun Munisípiu Bobonaru inklui Ensinu Pré-Eskolár (EPE) suku Oe-leu, postu administrativu Bobonaru, iha lista prioridade hodi submete ba Ministériu Edukasaun atu konsidera hodi konstrui fali iha tinan 2027.
Eskola ne’e ho saladeaula tolu ne’e nia kondisaun la dignu ona atu utiliza ba prosesu ensinu no aprendizajen, tanba daudaun uma nia kakuluk ku’ak no dodook hotu ona, tanba konstrui dezde tempu okupasaun Indonézia iha tinan 1988.
Diretór Servisu Munisipál Edukasaun Bobonaru, Miguel Freitas, relata katak durante nia mandatu la inklui EPE Oe-leu iha prioridade ba reabilitasaun iha tinan hirak liubá, tanba la simu informasaun no pedidu husi inspetór eskolár no jerente eskola.
Notísia relevante: Edifísiu EPE Oe-leu aat, fó risku ba alunu-manorin
“Ha’u simu informasaun no haree mós fotografia jornalista hatudu ne’e grave tebetebes. Ne’e mak Oe-leu ne’e ha’u konsidera no tau kedas prioridade hatama ba planu edukasaun munisipál Bobonaru nia ba tinan 2027. Ha’u sei esforsu atu responde ba ezijénsia ne’e. Ita haree katak alunu sira tuir ensinu no aprendizajen ne’e terus”, nia informa ba jornalista sira, ohin.
Xefe suku Oe-leu, Januário Bragança, hateten autoridade lokál identifika ona terrenu bainhira Governu hakarak konstrui eskola ne’e.
“Tanba eskola ne’e besik kedas komunidade nia uma, ema barak mai barullu, dalaruma balun loke koluna entaun difikulta labarik sira atu fokus saida mak profesor sira esplika. Depois fatin ne’e mós risku ona, tanba iha kraik ne’e rai komesa mamar”, nia dehan.
Tuir dadus, totál estudante EPE Oe-leu tinan letivu 2026 ne’e hamutuk 45 no iha manorin ida ne’ebé asume mós kargu hanesan koordenadora eskola nian.
Notísia relevante: Konstrusaun eskola EBF Dom Mauloe suku Oe-leu paradu
Jornalista: Sergio da Cruz
Editora: Maria Auxiliadora
