BOBONARU, 09 Fevereiru 2026 (TATOLI)-Kondisaun edifísu Ensinu Pré-Eskolar (EPE) Oe-leu, iha postu administrativu Bobonaru, munisípiu Bobonaru, fó ameasa ba estudante no manorin sira, tanba uma nia kakuluk hahú dodook no ku’ak hotu.
Koordenadora EPE Oe-leu, Aninhas de Lima Serqueira, relata katak problema ne’e difikulta tebes ensinu no aprendizajen, liuliu iha tempu udan no anin-boot, tanba zinku, ai no plafon eskola nia aat hotu ona.
Eskola ho totál saladeaula tolu ne’e nia kondisaun aat totál, tanba konstrui dezde tempu okupasaun Indonézia iha tinan 1988.
Notísia relevante: ME loke konkursu ba projetu konstrusaun saladeaula 500 iha Marsu
“Tempu udan no anin ami labele halo ensinu no aprendizajen, tanba kondisaun eskola la di’ak no aat todan. Kalen sira ne’e dodok hotu, ami ta’uk. Tempu udan bee tama, aula la’o la di’ak”, nia informa ba Tatoli, ohin.
Xefe suku Oe-leu, Januário Meta Tae Bragança, dehan ba kestaun ne’e líder komunitáriu no jerente eskola sira hato’o ona ba Diresaun Servisu Munisipál Edukasaun Bobonaru no tinan hirak liubá Antigu Ministru Edukasaun, Armindo Maia, mós mai observa direta ona.
“To’o agora ami seidauk rona informasaun ruma husi parte kompetente. Ami garante sira atu konstrui tanba edifísiu ida ne’e grave loos ona. Ami fiar husi parte edukasaun bele konsidera ami-nia proposta atu hadi’a, tanba fatin ida ne’e ita ta’uk. Hanorin hela mak kalen ho ai sira ne’e monu, risku boot ida tan ba sira”, dehan.
Totál estudante EPE Oe-leu tinan letivu 2026 ne’e hamutuk 45 no iha manorin ida ne’ebé asume mós kargu hanesan koordenadora eskola.
Notísia relevante: Orsamentu PNDS 2026 iha Bobonaru aloka ba obra 50 no projetu adisionál 18
Jornalista: Sergio da Cruz
Editora: Maria Auxiliadora
