BOBONARO, 07 fevereiru 2024 (TATOLI) – Vise-Ministru Administrasaun Estatál, Jacinto Rigoberto, kuarta ne’e ofisialmente fó pose ba estrutura foun autoridade munisipál Bobonaro, kompostu hosi Sekretáriu Autoridade, Diretór Servisu Munisipál no Administradór Postu Administrativu Atabae, Balibo, Maliana, Cailaco, Bobonaro no Lolotoe.
Vise-Ministru Jacinto Rigoberto, hateten ho serimónia pose ne’e kompleta ona aparelu autoridade munisípiu Bobonaro, maibé tempu badak mós sei iha serimónia hanesan ba Prezidente Autoridade Munisípiu foun, oinsá prepara-aan implementa polítika desentralizasaun administrativa no podér lokál.
Nia apela ba emposadu sira hotu atu servisu maka’as, disiplina no loke liman hodi envolve Bobonaro-oan hotu iha prosesu dezenvolvimentu, liuliu iha preparasaun atu simu podér lokál.
Tuir nia, Bobonaro atu di’ak no nabilan iha Bobonaro-oan sira nia liman, tanba ne’e nia enkoraja estrutura foun autoridade munisipál atu servisu hamutuk ho estrutura tuan sira hodi presta atendimetu di’ak liután ba komunidade.
Notísia relevante: Autoridade Bobonaro fahe envelope fiskál 2024 ba diresaun 10 no postu neen
“Lolo-liman ba malu hodi servisu nu’udar ekipa atu harii Bobonaro ida furak no dezenvolve halo didi’ak, mai hatudu katak ita prontu serbí ba presta atendimentu di’ak ba públiku hodi hala’o atividade governasaun no dezenvolvimentu ho atividade komunitária, mai ita servisu hamutuk loron loron ba konstrusaun harii país ida justu, igualidade no prósperu liu ba ita hotu,” nia hateten.
Rigoberto subliña emposadu sira bele orgullu ho kargu ne’ebé iha, maibé labele kontente liu kargu ne’e todan no responsablidade tanba povu sei moris iha mukit nia laran.
“Ita Tenke tau interse povu nia hodi serbí sira ho di’ak, ita hatene katak IX Governu iha ninia programa desentralizasaun podér lokál, nu’udar prioridade ba ninia mandatu, ita-boot sira nia prezensa nu’udar aparelu, mákina estadu iha munisípiu atu serbí maka’as hodi konkretiza planu priordade ne’e,” nia katak.
Prezidente Autoridade Munisípiu Bobonaro, Ernesto de Oliveira Barreto, enkoraja emposadu sira atu servisu ba interese munisípiu Bobonaro nian.
“Tau Bobonaro ida de’it, iha imi-nia fuan hodi serbí komunidade hotu, labele tau komunidade iha fuan, ne’ebé mak rekomenda ita-boot sira hatudu servisu, atendimetu públiku aas liu interese seluk, Bobonaro presiza imi-nia matenek, servisu ho profisionál, la’ós ko’alia deit,” nia dehan.
Nia husu ba Sekretáriu Autoridade Munisípiu Bobonaro na’in-tolu hamutuk ho diretór servisu munisipál sira atu servisu maka’as hodi ezekuta orsamentu 2024 ho rosponsabilidade tuir matadalan ne’ebé iha ona
Nia hatutan, iha tinan fiskál 2024 ne’e munisípiu Bobonaro hetan alokasaun orsamentu hosi Governu Sentrál porvolta millaun $9 resin no montante ne’e hetan liuhosi estrutura tuan sira-nia esforsu no sakrifísiu.
“Orsamentu hirak-ne’e hein hela ita-boot sira-nia prezensa, hodi prepara planu ba ezekusaun, keta haluha katak ema lubuk oan ida sira-nia kolen, sakrifísiu mak tinan ida ne’e ita Bobonaro hetan alokasaun signifikadu ba dezenvolvimentu munisípiu Bobonaro,” nia akresenta.
Autoridade Munisípiu Bobonaro hanesan pesoál koletiva direitu públiku dotada autonomia administrative,autonomia finanseira ne’ebé sujeita no tutela ba Ministeriu Administrasaun Estatál,regula ho estatutu autoridade munisipál no grupu tekniku interministeriál ba desentralizasaun administrativa aprova hosi dekretu-lei númeru 03/2016, 16 marsu,ho redasaun aprovadu husi dekretu lei númeru 84/2023,23 novembru.
Notísia relevante: Autoridade Bobonaro la ‘toba dukur’ ba kondisaun estrada Galisapulu
Jornalista: Sérgio da Cruz
Editór: Evaristo Soares Martins
