BOBONARO, 26 janeiru 2023 (TATOLI) – Autoridade Munisípiu Bobonaro (AMB) kontinua halo esforsu no ‘la toba dukur’ ba kondisaun estrada iha aldeia Galisapulu, suku Lahomea, postu administrativu Maliana ne’ebé ameasa atu kotu kauza hosi rai-halai hafoin akontese udan-boot dezde tinan kotuk to’o agora.
Sekretáriu Autoridade Munisípiu Bobonaro, João de Fátima do Carmo, hato’o pozisaun ne’e relasiona ho informasaun ne’ebé públiku kestiona katak estrada refere grave ona mós autoridade munisípiu Bobonaro sei ‘toba dukur’ hela.
Notísia relevante: Rai kontinua halai, abitante sira ezije Governu normaliza estrada Galisapulu
Hafoin akontesimentu iha tinan kotuk, liu de’it loron ida prezidente autoridade munisípiu Bobonaro, Ernesto de Oliveira Barreto no tékniku programa dezenvolvimentu integradu munisipál (PDIM) tún kedas ba terrenu hodi haree kondisaun estrada refere.
Hafoin observa, Ernesto de Oliveira Barreto, kontaktu kedas kompañia Mira-Mar mobliza ekipamentu pezadu tún ba halo normalizasaun hodi fasilita movimentasaun komunidade atu asesu ba mai.
Maibé infelizmente ekipamentu pezadu ne’e retira hosi estrada refere kontinua monu fila-fali hodi difikulta movimentasaun transporte públiku no Privada hosi diresaun kapitál Maliana ba postu administrativu Bobonaro, Lolotoe no munisípiu Covalima.
“Ida-ne’e mak kondisaun ne’ebé ita hasoru, ita hotu hatene rai ne’e dodok ona, ita labele satán ho situasaun ida agora, katak hadi’a tiha monu fali. Ne’e atu dehan de’it ami la’ós toba dukur de’it. Ita iha regra no kompeténsia ne’ebé governu sentrál delega mai, ita halo serbisu tuir orientasaun ne’ebé hosi nasionál hatún mai,” nia informa ba jornalista sira iha Maliana, kinta ne’e.
Tuir nia, iha Orsamentu Jerál Estádu (OJE 2023) autoridade munisípiu Bobonaro liuhosi diresaun servisu munisipál obra públika hetan de’it alokasaun orsamentu $20.000 hodi halo manutesaun ba estragu emerjénsia sira-ne’ebé akontese iha postu administrativu neen.
“Ita-nia orsamentu ne’e mós agora ita seidauk hetan transferénsia mai tanba kesatun sistema seidauk loke. Ha’u hanoin ida -e’e mós lato’o atu responde ba ida-ne’e,” nia hateten.
Adjuntu Prezidente Autoridade Munisípiu Bobonaro ne’e akresenta, daudaun ne’e estrada refere iha hela prosesu konstrusaun hosi kompañia lokál Viamor Unipesoál Lda.
“Ita labele halo proyek di atas proyek maibé ita hanesan autoridade nafatin fó hanoin ba empreza ne’ebé mak halo hela konstrusaun ne’e atu nune’e estrada ne’e bele normaliza, maibé nia kondisaun ne’e tanba natureza, ita halo ohin oras ida sobu fali,” João dehan.
Notísia relevante: Deputada Maria Barreto husu Governu normaliza estrada Galisapulu
Jornalista : Sérgio da Cruz
Editór : Evaristo Soares Martins
