iklan

EKONOMIA, BOBONARO, HEADLINE, MUNISÍPIU

Rai kontinua halai, abitante sira ezije Governu normaliza estrada Galisapulu

Rai kontinua halai, abitante sira ezije Governu normaliza estrada Galisapulu

Kondisaun estrada iha aldeia Galisapulu, suku Lahomea, postu administrativu Maliana, munisípiu Bobonaro, ne'ebé hetan estragu hosi dezastre naturál. Imajen espesiál.

BOBONARO, 25 janeiru 2023 (TATOLI) – Komunidade sira kontinua ezije ba VIII governu konstitusionál atu halo normallzasaun estrada iha aldeia Galisapulu, suku Lahomea, postu administrativu Maliana, munisípiu Bobonaro ne’ebé daudaun ne’e ho kondisaun grave hafoin akontese udan-boot durante ne’e hodi rezulta rai-halai.

Enkuantu foin lalais ne’e autoridade munisípiu Bobonaro aluga ona ekipamentu pezadu normaliza ona kondisaun estrada ne’e, maibé akontese udan-boot iha semana kotuk to’o agora kontinua aat fila-fali hodi difikulta movimentasaun transporte públiku.

Notísia relevante: Movimentasaun transporte públiku difisil ultrapasa dalan Galisapulu-Lahomea

“Ha’u reprezenta motorista sira husu ba parte kompetente atu rezolve lalais estrada ne’ebe ami komunidade no motorista sira enfrenta durante ne’e,” motorista Abel de Jesus Gusmao informa ba Jornalista sira iha Galisapulu.

Tuir nia, kada tinan bainhira akontese udan-boot estrada refere sempre ameasa hosi dezastre naturál hodi difikulta movimentasaun transporte públiku no privada.

“Ami husu ba parte governu nian, atu labele halo manutensaun ne’ebé maka tahu hela ne’e ita bot sira mai taka tán ho tahu, ne’e udan boot sai nafatin difikuldade mai ami,” nia katak.

Abitante Domingos Barreto Tavares, sente triste haree ba kondisaun estrada refere tanba bainhira akontese udan-boot rai kontinua halai rezultadu tahu mak nakonu no halo estrada namdoras.

“Ami dalaruma hein malu de’it, motorizada sira bele liu, maibé kuitadu ami ho karreta ne’e atu liu ba sorin de’it mós susar la halimar, hein malu to’o oras ida-resin, tanba balu tama sala mout ona, ami tenke ajuda dada malu sai tiha mak foin bele liu,” nia haktuir.

Iha fatin hanesan abitante, Almeiro da Cruz Lopes, husu ba Governu no Parlamentu Nasionál atu tún observa direita kondisaun estrada refere.

“Governu ho Parlamentu labele dehan de’it buat hotu di’ak, maibé sira nunka mai hare, vidru metan tiha depois la liga estrada. Ida-ne’e mak ba ami povu (Bobonaro) sente la satisfaz, ami hakarak mak governu tenke tún lalais mai halo normalizasaun,” nia katak.

Tuir observasaun Jornalista Agência Tatoli iha terrenu nota katak, movimentasaun transporte públiku diresaun kapitál Maliana ba postu administrativu Bobonaro no Lolotoe no munisípiu Covalima kontinua la’o, maibé presiza hein malu tama rai haliis no namdoras.

Notísia relevante: AMB sei esforsa normaliza estrada Galusapulu

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!