BOBONARO, 09 janeiru 2023 (TATOLI) – Autoridade Munisípiu Bobonaro (AMB) lideradu Ernesto de Oliveira Barreto, sei kontinua halo esforsa hodi normaliza hikas estrada iha aldeia Galusapulu, suku Lahomea, postu administrativu Maliana, munisípiu Bobonaro.
Hafoin akontese dezastre naturál ne’e, Prezidente Autoridade Munisípiu Bobonaro, Ernesto de Oliveira Barreto, hamutuk ho ekipa tékniku Programa Dezenvolvimentu Integradu Munisipál (PDIM) tún ba terrenu hodi haree kondisaun estrada refere.
Nune’e kontaktu kedas ba Institutu Jestaun Ekipamentu Apoiu Dezenvolvimentu Infrastrutura, Institutu Públiku (IGEADI,I.P) maibé labele halo intervensaun, tanba estrada refere responsabiliza hela hosi empreza Viamor Uniesoál Lda.
Relasiona ho kestaun ne’e, Prezidente Autoridade Munisipál Bobonaro foti kedas medida hodi bolu empreza Miramar iha loron-domingu (08/01) no mobiliza ekipamentu pezadu halo normalizasaun estrada refere hodi fasilita movimentasaun transporte públiku no privada asesu ba mai kapitál Maliana ba postu administrativu Lolotoe no Bobonaro.
Maibé iha loron segunda, 09;16, Ernesto de Oliveira Barreto simu informasaun hosi komunidade katak estrada refere kontinua aat fila-fali,halo tranporte públiku no privada difisil ultrapasa ba-mai.
Notísia relevante: Movimentasaun transporte públiku difisil ultrapasa dalan Galisapulu-Lahomea
“Sé karik ohin mós nia la to’o, hakarak ka lakohi autoridade tenke foti desizaun, ami autoridade munisípiu laiha orsamentu boot, maibé atu normaliza de’it movimentu ne’e bele ba-mai ho di’ak,” nia informa ba jornalista sira iha kna’ar-fatin, segunda ne’e.
Kona-bá kompañia Miramar halo normalizasaun, Ernesto subliña, autoridade sei prevee orsamentu depende ba empreza ne’e husu.
“Ema husu hira-hira hakarak ka lakohi tenke fó de’it ona, tanba ema serbisu tiha ona, tanba ita atu kontratu la biban, tempu ne’e badak tebes, entaun ha’u hatete ba sira materiál ne’e mai lai, depois mak ita-boot nian, tékniku sira haree volume servisu ne’e halo nusá, ita-boot sira husu hira ami selu tuir ida-ne’e,” Ernesto katak.
Prezidente Autoridade Munisípiu Bobonaro ne’e husu ba komunidade sira atu labele lansa informasaun iha mídia sosiál katak autoridade munisípiu la tau matan ba kondisaun estrada refere.
“Ha’u lee facebook dehan autoridade oras ne’e sei toba hela, maibé ha’u atu dehan de’it katak autoridade ne’e la toba ida, Ami-nia atensaun ne’e sempre ba iha-ne’ebá,” nia katak.
Iha fatin seluk, Komunidade Martinho dos Santos Barreto, sente kontente no agradede ba autoridade munisípiu Bobonaro tanba bele hola ona medida ruma no espera katak sei kontinua halo intervensaun bainhira akontese grave fila-fali.
“Ami sente triste loos, hare estrada ida-ne’e tanba tinan-tinan maka nune’e hela de’it, udan ona sempre hanesan ne’e, ami fiar katak sira bele rezolve lalais, sé lae mak udan mak tan estrada ne’e kotu totál, ami sira povu ne’e susar ona atu lori produtu ba merkadu no ba nesesidade sira seluk,” nia hateten.
Iha tinan kotuk Governu liuhosi reuniaun Konsellu Ministru aprova ona projetu ne’ebé aprezenta hosi Ministru Obra Públika Abel Pires, hodi autoriza prosedimentu aprovizionamentu estrada urbana Maliana pakote I ho valór globál ne’ebé estimasaun $16,314.392,06.
Enkuantu estrada urbana Maliana pakote II, estrada prinsipál ho estimasaun valór globál $23,587.019,36.
Notísia relevante: Governu presiza halo intervensaun urjénsia ba estrada Galisapulu iha Bobonaro
Jornalista : Sérgio da Cruz
Editór : Evaristo Soares Martins
