DILI, 03 abril 2023 (TATOLI)—Embaixadór Timor-Leste ba Reinu Unidu, João Paulo da Costa Rangel, segunda ne’e, hasoru malu ho Don Virgílio Kardeál do Carmo da Silva, SDB. hodi husu bensaun, molok hala’o misaun Estadu iha Reinu Unidu.
“Vizita ne’ebé ohin ha’u halo, nu’udar sarani Katólika mai husu Amu-nia bensaun. Tanba misaun ne’ebé ha’u hala’o ba ne’e, reprezenta ita-nia rai hodi tau matan ba ita-nia maluk sira ne’ebé buka moris iha Reinu Unidu,” João Paulo da Costa Rangel, hateten ba jornalista sira iha Kámara Eklesiástiku, Lecidere, Dili, segunda ne’e.
Nia hateten, iha vizita ne’e Don Virgílio simu ho laran haksolok no hatudu domin tomak ba knaar ne’ebé hetan hodi tau matan maluk sira iha Reinu Unidu.
“Ita-nia maluk sira ne’ebé buka moris iha Reinu Unidu la’os sai sidadaun Timór de’it maibé mós nu’udar sarani katóliku. Ho ida ne’e, ha’u mai hasoru Don Virgílio, nu’udar Uma-Kreda nia ulun, no futuru mai karik Maromak tulun sei lolo liman to’o iha ne’ebá, tanba ha’u mós konvida Don Virgílio sei ba vizita sarani katólika iha Reinu Unidu iha tinan ne’e,” João Paulo hateten.
Notisia relevante : PM Taur husu Embaixadór João mellora prestasaun servisu Estadu nian iha Reinu-Unidu
Nia dehan, maluk timor-oan sira ne’ebé daudaun buka moris iha Reinu Unidu ajuda tebes nasaun Timor-Leste, tanba ne’e atu mellora prestasaun servisu Estadu sira de’it mós la to’o nune’e presiza mós tenke hetan tulun hosi uma-kreda. Nune’e maske sira buka moris iha ema-nia rai maibé hetan nafatin tulun hosi vida esperituál ninian.
“Tuir númeru ne’ebé ha’u hetan ita-nia maluk sira ne’ebé daudaun buka moris iha Reinu Unidu hamutuk 60.000. Hosi númeru ne’e barak tebes presiza ita hotu nia apoiu,” reprezenta Estadu Timor-Leste iha Reinu Unidu ne’e hateten.
Iha fatin hanesan, Don Virgílio Kardeál ne’ebe nu’udar mos Arsebispu Arkidiseze Metropolitana Dili ne’e fo agradese ba Embaixadór Reinu Unidu João Paulo da Costa Rangel, ne’ebé simu knaar boot ida ne’e reprezenta Estadu Timor-Leste iha Reinu Unidu.
“Ohin, Embaixadór hala’o nia vizita ida ne’e, mai dada lia oituan kona-ba servisu ne’ebé nia sei hala’o iha Reinu Unidu. Durante dada lia ko’alia liuliu haree ba aspetu saida mak Uma Kreda nian bele apoiu ba maluk sira ne’ebé hala’o servisu iha Reinu Unidu,” Don Virgílio Kardeál hateten.
Don Virgílio hateten, dala-barak maluk sira iha Reinu Unidu sempre husu mai sira presiza uma-kreda haruka amu lulik ba Reinu Unidu hodi halo miza no reza nomos atende konfesa ba sira-nia nesesidade espirituál ninian.
“Ha’u seidauk promote maibé iha posibilidade, esperansa ba oin, bainhira Embaixadór to’o ona iha ne’ebá hala’o ona servisu mak, ami iha ne’e mós koko hakaas an, ha’u buka nafatin dalan oinsá loron ida bele hetan amu lulik sira ka madre sira balu timor-oan ne’ebé bele reprezenta uma-kreda Timór ba hala’o knaar fó apoiu espíritual morál ba ita-nia maluk sira iha Reinu Unidu,” Don Virgílio dehan.
Jornalista : Arminda Fonseca
Editora : Armandina Moniz
