DILI, 28 marsu 2023 (TATOLI)— Primeiru Ministru (PM), Taur Matan Ruak husu Embaixadór Timor-Leste ba Reinu Unidu, João Paulo da Costa Rangel, atu mellora prestasaun servisu Estadu nian hodi tau matan ba maluk timor oan sira ne’ebé hela no servisu iha Reinu Unidu.
Embaixadór Timor-Leste ba Reinu Unidu, João Paulo da Costa Rangel, hateten nia-parte ohin halo enkontru ho Primeiru Ministru ho objetivu atu hato’o agradese ba konfiansa ne’ebé simu no hamutuk ho Prezidente Repúblika ne’ebe fó ona fiar hodi sai Embaixadór ba Reinu Unidu.
“Orientasaun prinsipál ne’ebé Primeiru Ministru fó mai ha’u mak, durante iha ha’u-nia mandatu atu servisu hamutuk ho entidade governamentál hotu oinsá mellora prestasaun servisu Estadu nian ba iha ita-nia maluk sira ne’ebé hela iha Reinu Unidu. Tanba ita hotu hatene, maluk timor-oan barak mak hela iha Reinu Unidu hodi buka moris,” João Paulo da Costa Rangel, hateten ba jornalista sira hafoin hasoru malu ho PM Taur iha Palásiu Governu, Dili, tersa ne’e.
Notisi relevante : Horta fó pose ba Embaixadór dezignadu ba Reinu Unidu
Nia dehan, mandatu ne’ebé nia hetan, sai Embaixadór ba Reinu Unidu ne’e, durante tinan tolu, maibé depende kualidade servisu mós, no fulan abril ne’e, nia parte sei desloka ba Reinu Unidu atu hahú servisu.
Nia dehan, ema hotu hatene, daudaun timor-oan barak atu servisu iha Reinu Unidu liuhosi prosesu barak liuliu tenke liuhosi Embaixadór Portugál, no prosesu sira ne’e, sai prioridade ba Embaixadór iha Reinu Unidu maibé daudaun nia parte labele promete lai.
“Ohin loron ita hotu hatene, ita-nia rai servisu menus oituan no ita-nia joven sira presiza kampu traballu. Prioridade sira ne’e tama hotu iha ita-nia servisu maibé daudaun ne’e, ha’u labele promete lai maibé nudar Embaixador sei tenta atu ajuda ita-nia joven sira ne’ebé mak hakarak servisu iha futuru mai,” nia dehan.
Jornalista : Arminda Fonseca
Editora : Armandina Moniz
