DILI, 10 maiu 2023 (TATOLI)—Reuniaun Konsellu Ministru iha kuarta ne’e aprova alterasaun dahuluk rezolusaun Governu númeru 36/2022, loron 28 dezembru, kona-ba nomeasaun membru Konsellu Jerál Universidade Nasionál Timor-Lorosa’e (UNTL).
Projetu rezolusaun Governu ne’e aprezenta hosi Ministru Ensinu Superiór, Siénsia no Kultura, Longuinhos dos Santos.
“Alterasaun ida-ne’e atu aumenta rezolusaun Governu ba nomeasaun João Baptista Fernandes Alves hanesan Prezidente ba Konsellu Jerál UNTL, hanesan personalidade ne’ebé iha méritu koñesidu iha setór privadu,” Ministru Prezidénsia Konsellu Ministru, Fidelis Manuel Leite Magalhães, hateten hafoin reuniaun ezekutivu iha Palásiu Governu, kuarta ne’e.
Notísia relevante : Senadu UNTL sei lori estudante foun hasoru PN iha aban
Estatutu UNTL hatuur iha dekretu-lei númeru 10/2010, ne’ebé aprovadu iha Konsellu Ministru iha loron 25 agostu 2010, iha govenasaun ne’ebé lidera hosi Primeiru-Ministru, Kay Rala Xanana Gusmão, no momentu ne’ebá Ministru Edukasaun, João Cancio Freitas.
Dekretu-Lei ne’e promulgadu hosi Prezidente Repúblika, José Ramos Horta iha loron 12 outubru 2010 no publika ona iha Jornál Repúblika ho kapítulu VI artigu 62.
Jornalista : Antónia Gusmão
Editora : Julia Chatarina
