OEKUSI, 29 Maiu 2025 (TATOLI)– Diretór Diresaun Rejionál Infraestrutura (DRI), Remígio Nuno Sila, informa katak planu atu implementa projetu sira aprova husi Konsellu Administrasaun Fundu Infraestrutura (KAFI) ba dala-haat nian, iha Rejiaun Administrativa Espesiál Oekusi Ambeno (RAEOA) sei fó prioridade liu ba reabilitasaun estrada rurál iha nivél suku no aldeia.“KAFI dahaat ita seidauk bele deside tanba iha observa projetu sira KAFI datoluk iha terenu sei la’o hela ita haree progresu di’ak mak reabilitasaun estrada ita sei haree fali sira-ne’ebé seidauk reabilita sei aposta iha tempu mai aprovasaun KAFI dahaat nian tanba ita kompara ho projetu morru protesaun gabiun balun la’o ona no balun seidauk la’o,” Remígio Sila, dehan iha Oekusi, ohin.
Notísia relevante:CAC kontinua kontrola kualidade projetu KAFI rejionál iha Oekusi
Nia epslika, bainhira implementasaun projetu sira KAFI rejionál datoluk progresu servisu atinje liu ona 50%, mak parte Diresaun Obra Públika sei fó paresér ba Autoridade RAEOA hodi anúsia KAFI dahaat.
“Ne’ebé ita hein katak iha fulan Juñu hanesan ne’e depende desizaun husi Autoridade RAEOA liuliu Prezidente Autoridade depois ita sei fó paresér hanesan tékniku oinsa ita-bele kontinua deside, maibé ita sei haree prinsipál liu, tanba proposta barak mai husi kompañia sira, entaun ita sei haree maibé prioridade liu mak estrada, tanba iha suku no aldeia balun sira-nia estrada seidauk hadi’a, entaun ba oin ne’e ita sei foku ba reabilitasaun estrada rurál sira,” nia dehan.
Notísia relevante:KAFI Rejionál sei buka solusaun ba problema reabilitasaun estrada Oébaha bá Bitopa
Molok ne’e, Konsellu Administrasaun Fundu Infraestrutura (KAFI), rejionál datoluk liderada husi Prezidente Autoridade RAEOA, Rogério Tiago Lobato, aprova projetu emerjénsia 27 ho kustu millaun $36,928,720.47, ne’ebé aloka mai husi fundu infraestrutra nasionál atu ezekuta iha tinan ne’e.
Entretantu, tuir dokumentu neʼebé Ajénsia TATOLI,I.P asesu iha Diresaun Rejionál Infraestrutura (DRI) katak, KAFI dahuluk konsege ezekuta projetu hamutuk tolu (3), KAFI daruak ezekuta projetu ualu (8) projetu lima kona-ba reabilitasaun estrada rurál sira, ponte rua no gabiun ida no KAFI datoluk mak sei ezekuta projetu 27 iha tinan ne’e.
Notísia relevante:KAFI Oekusi aprova projetu emerjénsia 26 ho kustu millaun $36-resin
Jornalista: Abílio Elo Nini
Editór: Florencio Miranda Ximenes
