DILI, 03 outubru 2024 (TATOLI) – Sekretáriu Jerál Partidu Demokrátiku (PD), António da Conceição, dehan rezultadu reuniaun alargada ne’ebé lideradu husi Prezidente Partidu CNRT atuál Primeiru-Ministru Xanana Gusmão no Prezidente Partidu Demokrátiku, Mariano Assanami Sabino, ne’ebé partisipa husi Sekretáriu Jerál Partidu CNRT Francisco Kalbuady Lay, membru Governu husi CNRT no PD inklui Deputadu husi partidu rua referida konkorda lori IX Governu to’o mandatu 2028.
“Membru Nonu Governu Konstitusionál hosi koligasaun entre partidu CNRT no PD ne’ebé lidera husi Primeiru-Ministru maun bo’ot Kay Rala Xanana Gusmao hala’o reuniaun, kona-ba konsolidasaun husi membru Parlamentu ho bankada Governu nian. Objetivu husi reuniaun konsolidasaun né’e mak hodi hametin liután koligasaun entre partidu CNRT no Partidu Demokrátiku atu asegura estabilidade Governativa to’o mandatu remata iha 2028″, António da Conceição, hateten ba journalista sira liuhusi konferénsia imprensa iha Sentru Konvensaun Dili, kinta ne’e.
Kalohan dehan, Nonu Governu no Bankada Governu halo avaliasaun hamutuk hodi haree ba ezekusaun Orsamentu Jerál Estadu 2024. Iha avaliasaun ne’e indentifika dezempeñu seidauk másimu no buka atu hadia liután bá 2025.
“Membru Governu sira aprezenta planu asaun ruma ne’ebé reflete iha Orsamentu Jerál Estadu 2025 nian bá membru Parlamentu husi Bankada Governu, nune’e membru Parlamentu husi bankada Governu iha entendimentu di’ak kona-ba OJE 2025 hodi prepara ba diskusaun proposta OJE 2025 iha Parlamentu Nasionál iha tempu besik”, nia adianta.
Sekretariu Jerál PD realsa, iha reuniaun ne’e, koligasaun partidu rua konkorda hodi hametin koordenasaun servisu entre membru Governu sira atu implementa ho di’ak no programa anuál bá tinan 2025.
Koligasaun CNRT-PD husu IX Governu atu selu dívidas Governu anteriór no halo auditoria ba ezekusaun OJE 2024.
“Reuniaun koordenasaun ne’e mós atu selu dívidas husi Governu uluk, maibé nafatin halo auditoria bá Orsamentu Jerál Estadu Governu uluk nian”, nia afirma.
Kalohan hateten, koligasaun CNRT no PD husu IX Governu atu kontrola ezekusaun Orsamentu Instituisaun Estadu hotu nian.
Nia dehan, Nonu Governu mós selebra ona kontratu ho Autoridade Auditória internasionál hodi halo auditoria.
“Nune’e reuniaun koordenasaun ne’e deside atu halo auditoria ba instituisaun públiku hotu, hodi evita irregulariedade, tanba osan povu nian. Maun bo’ot Kay Rala Xanana Gusmão hanesan Prezidente Partidu CNRT hamutuk ho Prezidente Partidu Demokratiku kompañeiru Mariano Assanami Sabino husu Membru Governu no Bankada Governu katak Nonu Governu mai la’os atu ukun maibé atu servi povu ho rai Timor-Leste”, nia koklui.
Jornalista: Natalino Costa
Editór : Zezito Silva
