DILI, 08 janeiru 2024 (TATOLI) – Komandante Polísia Nasionál Timor-Leste (PNTL) Munisípiu Dili, Superintendente Xefe Polísia, Orlando Gomes, dehan, polísia detein ona suspeitu na’in 15 ba konfrontu ne’ebé mosu área Aitarak-Laran Aldeia Anin Fuik, Suku Kampung Alor Postu Administrativu Dom Aleixo no Munisípiu Dili, tanba tuda hasoru polísia no estraga komunidade nia uma balun.
Kazu ne’e akontese iha domingu (7/1) tuku 4:000 madrugada, ne’ebé mosu ataka malu entre grupu rua no grupu rua mesak joven de’it tanba kauza haree malu matan la moos relasiona ho osan prezépiu nian.
Iha kompetisaun Prezépiu, grupu joven Aitarak-Laran mak manán, nune’e joven sira konvida malu hemu tiha iha bairru, maibé iha joven balun mosu deskontente tanba la hetan osan, nune’e provoka malu no to’o konfrontu tuda malu.
“Nune’e ita-nian parte polísia Munisípiu Díli tún kedan ba terenu hodi halo atuasaun, maibé atusaun ne’e, ita joven sira halo agresaun fízika hasoru ita-nian pesoál PNTL tanba ne’e mak momentu ne’e ita asegura ema 20-resin”, Orlando Gomes dehan ba jornalista sira iha nia kna’ar Caicoli, segunda ne’e.
Nia esplika, hosi ema 20-resin ne’e, PNTL asegura no lori kedan mai iha Eskudara Dom Aleixo atu halo identifikasaun no iha prosesu identifikasaun ne’e suspeitu nain-15 mak polísia asegura ona sela.
“Agora daudaun suspeitu sira ne’e ita asegura ona iha sela detensaun Eskudra Dom Aleixo. Suspeitu sira ne’e komete krime obstrusaun autoridade públiku, tanba sira halo asaun hasoru autoridade públiku liuliu halo asaun hasoru seguransa sira bainhira halo atuasaun”, nia adianta.
Orlando hateten, suspeitu nain-15, bainhira polísia halo tiha identifikasaun ba sira hodi husu autorizasaun ba kedan Ministériu Públiku hodi halo detensaun ba suspeitu sira hodi kumpre oras 72 molok submete ba primeiru interogatóriu iha Tribunál.
Nia dehan, asaun suspeitu sira nian ne’e mós rezuta danu simples tanba komunidade nia uma balun hetan tuda no balun hetan estragu.
Nia hateten, PNTL sei la tolera kuakler individu balun ne’ebé koko instabiliza situasaun, kuandu mosu mak polísia la hakiduk no sei atua ho forsa.
Jornalista: Natalino Costa
Editór : Zezito Silva
