VIQUEQUE, 20 janeiru 2024 (TATOLI)—Pesoál saúde iha postu saúde Uetali, suku Uma Uain Kraik, postu Viqueque Vila, munisípiu Viqueque atende pasiente moras grave iha tempu kalan utiliza de’it lanterna tanba la asesu linã eletrisidade.
“Kuaze tinan barak ona postu saúde Uetali enfrenta problema ba ahi eletrisidade, dala barak moras emerjénsia ruma mosu tempu kalan, ita-nia pesoál saúde sira utiliza de’it lantern mak hodi fó tratamentu ba ita-nia pasiente sira,” Xefe sentru saúde Viqueque Vila, João Cortereal, hateten ba Agência TATOLI, iha ninia kna’ar fatin, Viqueque Vila, ohin.
Xefe sentru saúde Viqueque Vila ne’e hatutan, durante ne’e nia parte hato’o beibeik pedidu ba Eletrisidade de Timor-Leste, Empreza Públika (EDTL, E.P) maibé to’o daudaun ne’e laiha resposta ruma ba preokupasaun ba ahi eletrisidade.
“Bainhira kazu emerjénsia mosu iha kalan ita-nia pesoál saúde atende pasiente grave, ita-nia pesoal saûde halo kedas transferénsia. Ida-ne’e difikulta ba ita-nia pesoal saúde sira. Ami sei esforsu husu EDTL, E.P fó atensaun ba ami-nia preokupasaun ne’e,” nia dehan.
Dadaun ne’e, pesoál saúde na’in-rua (2) mak destaka iha postu saúde Uetali, suku Uma Uain Karik kompostu husi enfermeiru ida (1) no parteira na’in-ida (1).
Prezidente Autoridade munisípiu Viqueque, Francisco C. S de Gonzaga Soares, rekoñese postu saúde Uetali no abitante sira-ne’e kuaze tinan barak la asesu ba liña eletrisidade.
“Ha’u husu parte Obra Púlika no EDTL, E.P iha tinan 2025 bele rezolve liña eletrisidade ba área Uetali, atu ita-nia komunidade no postu saúde bele asesu ba eletrisidade. Tanba eletrisidade ne’e sai importante ba komunidade sira,” nia dehan.
Antes ne’e, xefe Uma Uain Karik, Angelo Miguel da Silva Soares, hateten iha área Uetali ne’ebé seidauk asesu ba liña eletrisidade iha postu saude ida, edifísiu eskola ida no kapela ida.
“Iha mandatu Governu Konstitusionál da-hitu (VII), empreza balun mai instala ona ai-riin eletrisidade maibé agora ita haree sai abandonadu. Nunee, ha’u husu ba Governu KOnstitusionál da-sia (IX) atu kontinua fila-fali projetu eletrifikasaun ida-ne’e atu ami bele asesu,” nia dehan.
Hatán ba preokupasaun ne’e, Jestór EDTL, E.P Munisípiu Viqueque, Ernesto Sarmento, hatetn kona-ba preokupasaun eletrisidade ba área Uetali ne’ebé to’o agora komunidade no postu saúde seidauk asesu ba liña eletrisidade, iha tinan kotuk EDTL, E.P loke ona prosesu konkursu públiku.
“Prosesu konkursu públiku seidauk finál tanba ne’e mak ba área Uetali seidauk implementa dada eletrisidade. Karik sei sei implementa iha tinan 2025, tanba ne’e ita hotu pasiénsia hodi hein prosesu konkursu públiku ne’ebé daudaun ne’e sei la’o iha nasionál,” nia hateten.
Tuir dadús, populasaun iha suku Uma-Uain Kraik hela iha área Uetali hamutuk na’in-300 resin husi uma-kain 96, ne’ebé kompostu husi aldeia haat hanesan Uakae, Loho, Halderai no Cailoi, inklui suku viziñu Bahalara-Uain.
Jornalista : Vitorino Lopes da Costa
Editór : Cancio Ximenes
