BALIBO, 04 setembru 2023 (TATOLI)-xefe aldeia Bour, suku Leolima, postu administrativu Balibo, munisípiu Bobonaro, Carlos Caero, hateten durante ne’e bainhira balu moras no atu partu abitante sira tenke ‘hulan-malu’ hodi asesu ba fasilidade, tanba governu seidauk instala postu saúde iha área refere.
Lideransa aldeia ne’e konfirma situasaun ne’e araska liu bainhira akontese tempu udan monu-rai tanba kondisaun estrada ladi’ak.
“Ami tempu bailoron hanesan ne’e sente kontente tanba estrada di’ak hela, kuandu to’o dezembru ne’e labele ona ne’e estrada la di’ak, entaun ami ba Balibó ladi’ak, ami tenke ba Maliana, kuandu sira besik partu bele moris iha ne’e, se labele ha’u ho joven sira tenke hulan, haree dalan iha Halekou di’ak entaun ami liu iha ne’ebá, se ladi’ak ami liu Nunura de’it,” nia informa ba jornalista sira iha baiRru Surilaku, segunda ne’e.
Nia dehan, kondisaun estrada ne’e mós difikulta komunidade sira atu lori produtu lokál asesu ba merkadu.
“Ha’u-nia ema iha-ne’e maioria moris ho tabaku no modo-tahan de’it, kuandu estrada ladi’ak, ami susar tebes atu hetan osan,” nia triste.
Xefe suku Leo-Lima, Marcelino Magno, reforsa abitante aldeia Bour atu halo tratamentu saúde ruma tenke la’o distánsia dook no atu liu tenke hakuur mota.
“Kuandu udan, iha-ne’e mós atraves mota Nunura, mota Hataz, udan ita labele la’o ba mai ona mota-boot ne’e, ita mai lao de’it, ne’e mós araska oituan, iha-ne’e komunidade inan isin-rua labarik mate iha ne’e maka ba foti,” nia haktuir
Nia dehan, proposta kona-ba fasilidade saúde no estrada nia parte hato’o beibeik ba parte kompetente iha munisípiu no governu sentrál maibé to’o agora seidauk iha resposta ruma.
“Ami rekomenda ba governu se bele urjente tau postu saúde iha fatin ne’e,no estrada ne’e se bele iha programa 120 dias ne’e hadiak netik ba, estrada hodi Hataz liu iha ne’e ba to’o estrada nasionál,” nia fó hanoin.
Enkuantu totál uma-kain iha aldeia Bour hamutuk 150.
Notísia relevante: OJE 2023 : MS ezekuta ona 49% iha Janeiru to’o juñu
Jornalista: Sergio da Cruz
Editór: Evaristo Soares Martins
