DILI, 03 Jullu 2023 (TATOLI) – Diretór Nasionál Finansas iha Ministériu Saúde Miguel Maria, informa ezekusaun Orsamentu Jerál Estadu (OJE) 2023 atinje ona 49%.
”Durante janeiru to’o juñu, ita ezekuta ona OJE 2023 hamutuk rihun 30-resin ka 49% signifika ita ezekuta orsamentu metade ona”, Miguel Maria dehan iha nia kna’ar fatin MS ohin.
Nia informa, OJE 2023 alokadu ba Ministériu Saúde hamutuk $ 63.158,816.00 ne’ebé fahe ba kategoria saláriu vensimentu, bens servisu, kapitál menór, kapitál dezenvolvimentu no transferénsia públika.
”Husi metade sira ne’e mai husi saláriu vensimentu, bens servisu, kapitál menór, kapitál dezenvolvimentu no transferénsia públika”, nia hateten.
Nia afirma, Ministériu Saúde durante ne’e gastu makas liu iha transferénsia públika, iha tinan ne’e hetan alokasaun ba transferénsia ba pasiente ba rai liur liuliu opsitál I heal Malasia, Siloam Indonézia no Singapura hamutuk milaun neen, entaun ida ne’e ezekuta hotu ona.
”Invoice ne’ebé mak mai iha fulan abríl to’o agora ita seidauk halo pagamentu, entaun ita hein governasaun foun atu bele rezolve ida ne’e”, nia subliña.
Nia esplika, oramentu ne’ebé prevee ba tinan ida ne’e mak selu pagamentu dívida tinan anterior nian iha fulan tolu ikus outubru, novembru no dezembru 2022 no osan kuaze metade MS selu ona ba dividas entaun osan hela metade de’it atu responde ba tinan fiskál nian.
”Durante tinan hira ba kotuk, ita halo pagamentu ba ospitál rai liur hamutuk milaun 12 ba transferénsia nian maibé tinan ida ne’e menus milaun neen de’it signifika ita-nia osan menus liután”, nia haktuir.
Tanba ne’e, transferénsia moras ba rai liur la’o nafatin no hakarak ka lakohi ezersísiu orsamentu la’o nafatin atu propoin ba Ministériu Finansas atu haruka ba PM hodi halo aprovasaun tanba MS presiza aumenta milaun neen hodi bele rezolve problema sira liuliu tranferénsia moras ba rai liur nian.
Jornalista : Felicidade Ximenes
Editór : Zezito Silva
