BOBONARO, 21 agostu 2024 (TATOLI) — Marie Stopies International iha Timor-Leste (MSI-TL), kuarta ne’e hamutuk ho Diresaun Servisu Munisípiu Bobonaro, halo enkontru hodi halo avaliasaun ba progresu no dezafiu durante implementasaun programa planeamentu familiár no saúde reprodutiva durante tinan 2023 no trimestre daruak tinan 2024 nian.
MSI-TL serbisu iha kanál lima ho suporta husi Governu Austrália no Nova Zelándia ba munisípiu rua, iha Munisípiu hotu MSI-TL hala’o hotu kna’ar no klínika ida iha Dili.
Nune’e mós iha ekipa outtreach no ekipa haforsa sistema saúde serbisu hamutuk ho INSPTL no Ministériu Saúde suporta ba fornesidór saúde sira atubele fornese planeamentu familiár iha fasilidade saúde.
MSI-TL la’ós de’it halo atendimentu ba komunidade sira kona-ba saúde reprodutiva no planeamentu familiár, maibé MSI nos promove igualidade jéneru, rejilente no inkluziva atu empodera no dezenvolve setór saúde, ba sustentabilidade iha komunidade agora no ba futuru ba jerasaun tuir mai.
MSI-TL suporta feto no mane nia direitu atu hili no fó espasu ba sira-nia família ho livre, no fiar katak diversidade nu’udar ita-nia forsa, atu serbí komunidade hodi kria ambiente ne’ebe imparsiál no inkluzivu bazea ba informasaun ne’ebé mak ekipa MSI-TL fornese ona liuhosi akonsellamentu ne’ebé konfidensiál tebes.
Diretora MSI-TL, Maria Amelia Barreto, hateten durante tinan 2023 hetan vizitante rihun 23-resin no hahú husi fulan-janeiru to’o fulan-juñu tinan 2024 ne’e hamutuk rihun 12 mai partisipa iha programa planeamentu familiár inklui saúde seksuál reprodutiva liuhosi vizita klínika iha Dili, fasilidade saúde sira iha munisípiu no husu informasaun liuhosi liña foinsa’e.
MSI-TL nia serbisu foka ba parte rua, ida fahe informasaun no ida seluk halo atendimentu iha postu saúde ne’ebé eziste iha Timor-Leste.
Notísia relevante: Governu-Marie Stopes lansa programa ekipa baze “Outreach” iha Covalima
Enkuantu durante ne’e implementasaun programa planemantu familiar, MSI-TL hasoru difikuldade boot tanba komunidade laiha koñesimentu no sei fiar liu ba mitos, nune’e komunidade nia aseitavél iha métodu IUD ne’e menus tebes.
Alende ne’e difikuldade seluk ne’ebé MSI-TL hasoru iha implementa programa planeamentu familiár mak inan sira barak iha área sira-ne’ebé risku ho dezastre naturál.
“Ida-ne’e susar ba sira atu asesu programa planeamentu familiár, entaun responde saida mak MSI halo mak asegura atu inan sira-ne’e bele hetan atendimentu bainhira tempu bailoro, ne’ebé dala-barak MSI nia ekipa ida ba uluk fahe informasaun ba komunidade intende di’ak ona antes simu atendimentu planemantu familiár,” nia katak.
Iha oportunidade ne’e, Diresaun Servisu Autoridade Munisípiu Bobonaro mós kompromete atu apoia MSI-TL hodi melora di’ak liután implementasaun programa planeamentu familiár.
Notísia relevante: MSITL fasilita formasaun bá pesoál saúde Bobonaro
Jornalista: Sérgio da Cruz
Editór: Evaristo Soares Martins
