OÉ-CUSSE 25 marsu 2023 (TATOLI) – Prezidente Repúblika (PR), José Ramos Horta, informa, iha tempu badak sei konsulta líder istóriku Kay Rala Xanana Gusmão atu kontinua diskute ho Autoridade Repúblika Indonézia ba finalizasaun asuntu fronteira terrestre no fronteira marítima.
“Fronteira Terrestre tenki formaliza remata ne’e, maun Xanana ho Autoridade Indonézia mak haree ida-ne’e, ha’u espera eleisaun liu tiha tenki hahú fila-fali fronteira terrestre para rezolve tiha, rezolve ho matenek haree mós ho fleksibilidade, para depois hakat ba fronteira marítima Timor-Leste ho Indonézia,” Xefe Estadu ko’alia iha ámbitu palestra ofisiál iha otel Ambeno Oé-Cusse, sesta ne’e.
Tuir Xefe Estadu katak, fronteira marítima bo’ot-liu maka ho Austrália, maibé ho Indonézia ki-ikoan tebes tanba iha parte liman loos no liman karuk parténsia Timór nian, entaun ne’e simples ladún komplikadu maibé rezultadu di’ak ba Timor-Leste.
“Sé ita konsege rezolve fronteira marítima ho Indonézia, tuir ita-nia objetivu bele manán bo’ot-liu, purtantu ne’e prioridade tenki remata antes 2027, tanba jerasaun atuál jerasaun hosi 1975, agora ita rona jerasaun foun, maibé uluk mós envolve ona iha Governu, maibé to’o agora seidauk rezolve,” nia katak.
Xefe Estadu fundamenta, bainhira fronteira marítima no Terrestre rezolvidu, seguránsa forsa armada Polísia Nasionál Timor-leste (PNTL) sei forte, modernu no demokrátiku, no kualidade edukasaun iha universidade aumenta.
Jornalista: Abílio Elo Nini
Editór : Rafael Ximenes de A. Belo
