DILI, 23 setembru 2024 (TATOLI) – Diretór Jerál Servisu Rejistu Notaridu (DGSRN), Agostinho Gonsalves Viera, hateten Notariadu, agora, emite fali ona Billete Identidade (BI) orijinál ba komunidade.
“Sim, uluk kuandu ita-nia komunidade sira mai atu hasai Billete Identidade, ita fó temporaria hanesan ita boot sira haree baibain tanba kestaun ita-nia estoke ba Blanco BI mak laiha. Maibé agora ita halo akizisaun ba blanku orijinál BI nian tanba hola ne’e to’o mai ona no agora daudaun ita bele emite ona Billete Identidade Orijinál ba komunidade sira”, Agostinho Gonçalves, hateten ba jornalista sira iha nia kna’ar fatin, segunda ne’e.
Nia dehan, akizisaun ba blanku Billete Identidade ne’e halo iha Surabaya Indonézia.
“Ha’u la lembra ita hola ho osan montante hira no totál estoke hira, maibé ha’u atu dehan de’it katak ita iha fali BI orijinál ne’ebé ita atu emite ba ita-nia komunidade sira”, nia adianta.
Nia dehan, atendimentu emisaun Billete Identidade iha munisípiu hotu funsiona normál.
“Atendimentu emisaun BI iha Munisípiu Dili ne’e funsiona normál”, nia hakotu.
Jornalista: Natalino Costa
Editór : Zezito Silva
