DILI, 18 marsu 2024 (TATOLI) – Ekipa konjunta kompostu hosi Unidade Polísia Marítima (UPM), Protestasaun Sivil, Bombeiru, Cruz Vermelha Timor-Leste (CVTL), Ekipa Diving hosi Austrália inklui komunidade área Branca hetan ona sidadaun Alito Gama nia isin mate ne’ebé mout iha tasi área Branca Cristo nian iha domingu (17/3), horseik.
Matebian Alito Gama ho idade 18 ho nia kolega Matias da Costa sai hosi uma Kuluhun hodi ba tasi área Branca iha loron (16/3), sábadu kalan iha tuku 9:00 foin lalais ne’e, hodi ba buka ikan, tanba momentu ne’e tasi maran, ho nune’e sira ba buka ikan iha fatin refere maibé matebian ho nia kolega la fila fali ba sira nia uma to’o loron (17/3) tuku (02:00) madrugada Alito Gama mout iha tasi área Branca Cristo Rei.
Ho akontesimentu ne’e ekipa konjunta Unidade Polísia Marítima (UPM), Protestasaun Sivil, Bombeiru, Cruz Vermelha Timor-Leste (CVTL), ekipa Diving hosi Austrália inklui komunidade área Branca buka tuir kedan matebian.
Iha segunda (18/3), ohin, tuku 10:00 dader, ekipa konjunta konsege hetan ona mate isin Alito Gama iha tasi klaran maizmenus metru 200 hosi matebian nian mout fatin.
Komandante UPM, Superintendente Polísia Eúgenio Pereira, hateten ekipa konjunta hosi UPM, APC, Bombeiro CVTL, Diving hosi Austrália no komunidade área Branca hetan ona mate isin Alito Gama ne’ebé mout iha tasi ibun área Branca iha domingu (17/3).
“Ita-nia ekipa konjunta ohin dader tuku 10:00 konsege hetan ona alin Alito Gama nia mate isin ne’ebé mout iha tasi ibun área Branca Cristo Rei nian iha domingu horseik”, Eugénio Pereira hateten ba jornalista sira iha edifísiu UMP, segunda ne’e.
Komandante Eugenio dehan, matebian Alito Gama ho idade (18) hosi Munisípiu Lautem, Postu Administrivu Iliomar, tuir informasaun ne’ebé PNTL rekolla hosi matebian nia kolega Matias da Costa, haktuir momentu nia ho matebian mak la’o hamutuk ba tasi iha área Branca, sira-nain rua atu ba buka ikan tanba momentu ne’e tasi maran hela.
“Sira rua sai hosi uma matebian nia uma Kuluhun ba área Branca nune’e matebian Alito mout. Ho asidente ne’e komunidade informa kedan ba Polísia no Komandu PNTL no Komandu Jerál enkamiña informasaun ne’e ba UPM no UPM momentu ne’e halo kedan intervensaun hodi buka tuir sidadaun refere”, nia haktuir.
“Horseik loron tomak, ekipa konjunta no família kontinua buka ita-nia sidadaun no ohin ita konsege hetan ona no entrega ona mate isin ba parte família hodi halo prosesu autópsia iha Hospital Naaional Guidu Valladares”, nia informa.
Iha sorin seluk, sasin Mateus da Costa, haktuir momentu nia ho matebian Alito sai hosi uma Kuluhun iha sábadu (16/3) mai área Branca atu buka ikan no akontesimentu ne’e matebian mout ne’e iha tuku (17/3).
Nia konta, bainhira sira-nain rua to’o tiha área Branca, Alito (matebian) haruka ha’u ba sunu ahi hodi hein tasi maran hafoin ba buka ikan.
“Nia haruka ha’u sunu ahi, depois hein tasi maran. Binhira tasi maran, haree kolega balun sira tama ona iha laran, entaun ami rua mós tama tuir ba buka ikan, ami tuir maibé tasi sei naruk hela, ami sae ba leten, tasi maran tiha ona no ami sambil tiru ikan, ikan mós aumenta barak ona. Ami tiru, tasi sae mós ami la hatene, derepente tasi sa’e ha’u bolu ona nia, dehan Lito mai ita ba uma ona, entaun ami na’in-rua tun mai kedas, maibé sente labele tanba tasi naruk tiha ona, entaun ami nani ona, entaun nia dehan ajuda lai, nia forsa la iha, entaun ha’u ajuda depois rasta nia, maibé ha’u nia forsa la to’o, entaun ha’u halai ona ba rai-maran depois ha’u bolu kolega sira mai ajuda’’ nia konta.
‘’Lito la konsege salva, nia dehan ajuda lai, nia bolu ajuda lai, depois ha’u kaer nia liman no rasta maibé labele. Ha’u dada sai mós labele, entaun ha’u husik hodi halai sai, ha’u bolu kolega sira mai ajuda, sira mai heree maibé dehan óklu ho sinelus de’it’’, nia akresenta.
Iha fatin hanesan, matebian nia tiu Angelmo dos Santos haktuir Lito Gama nia mate nu’udar destinu, tanba ne’e parte família sei ladun ema ida no la deskonfia ema ruma relasiona ho Lito nia mate.
“Ami sei ladun ba ema no la deskonfia ema ida relasiona ho ami nia oan no subriñu nia mate ne’e. Ami só agradese ba PNTL liuliu UPM, APC, Cruz Vermelha Timor-Leste, Diving Austrália no komunidade área Branca ne’ebé ajuda buka ona matebian no ohin hetan fali matebian nia isin ida-ne’e mak ami atu agradese”, nia dehan.
Jornalista: Natalino Costa
Editór : Zezito Silva
