DILI, 28 abríl 2023 (TATOLI)—Adjuntu Sekretáriu Jerál Partidu FRETILIN, Flávio Maria da Silva, apela ba militante no povu tomak iha territóriu nasionál atu kontinua mantein pás no estabilidade iha ámbitu prosesu kampaña eleitorál to’o loron eleisaun (21 maiu).
“Dezde uluk kedas mensajen FRETILIN nian ba kuadru no militante hotu atu mantein pás no estabilidade tamba hodi hosik prosesu demokrásia ne’e la’o sidadaun ida-idak bele livre ezerse nia direitu,” Adjuntu Sekretáriu Jerál Partidu FRETILIN ne’e hato’o liuhosi konferénsia imprensa ba jornalista sira iha CCF, Comoro, sesta ne’e.
Tanba, nia dehan, importante tebes atu ida-idak mantein pás no estabilidade iha nia aldeia, bairru no suku, postu no munisípiu hodi hetan pás nível nasionál.
“Hodi nune’e, ita bele prepra an di’akliu ba 21 maiu 2023, entaun FRETILIN dezde uluk kedas apela nia militante ida-idak hakmatek halo serbisu didi’ak no buka ba atu konvense ema seluk hodi fó votu mai FRETILIN,” nia apela.
Klaru ne’e tenke pasífiku laiha violénsia no laiha intimidasaun, FREILIN ba hato’o programa tanba FRETILIN sempre aposta iha programa atu lori naroman ba povu.
Notísia Relevante: KJN husu CNE notifika individu utiliza atributu FRETILIN apoiu partidu seluk
Jornalista : Nelson de Sousa
Editór : Cancio Ximenes
