DILI, 22 Abríl 2026 (TATOLI)-Komisaun D ne’ebé Trata Asuntu Ekonomia no Dezenvolvimentu marka ona ajenda iha loron 29 Abríl hodi halo audiénsia ho Ministériu Petróleu no Rekursu Minerál (MPRM) atu atualiza medida resposta ba folin kombustivel ne’ebé sa’e iha rai-laran, ne’ebé kauza husi funu iha Médiu Oriente.
Prezidente Komisaun D, Ricardo Baptista, esplika razaun bolu ministru ne’e tanba haree ba folin kombustivel ne’ebé sa’e lori mós impaktu ba povu ki’ik sira.
Nia observa katak maioria estasaun kombustivel sira iha territóriu fa’an mina tuir limite másimu ne’ebé Governu estabelese, katak labele liu $1.50 kada litru ba gazolina no $1.65 kada litru ba gazóleu, maibé retallista balun fa’an iha munisípiu hatudu aumentu signifikativu.
“Hakarak husu ba Autoridade Nasionál Petróleu [ANP] ho autoridade seguransa atu kontrola reallista sira ne’ebé la kumpre hodi aplika sansaun ba sira”, nia hato’o iha Parlamentu Nasionál, ohin.
Deputadu ne’e mós husu ba públiku bainhira hetan retallista balun fa’an mina liu presu ne’ebé iha informa ba autoridade kompetente atu foti medida.
Tuir planu, Komisaun sei bolu mós dirijente husi Ministériu Komérsiu no Indústria (MKI), Sentru Lojistíka Nasionál, Ministériu Agrikultura, Pekuária, Peska no Floresta (MAPPF).
Tuir relatóriu husi Autoridade Nasionál Petróleu (ANP) ba períodu loron 15-17 Abríl 2026, folin gazolina sira iha estasaun kombustivel varia husi $1.25 to’o $1.50 kada litru, enkuantu folin gazóleu nian varia husi $1.30 to’o $1.65 kada litru.
Maibé, bazeia ba Tatoli nia observasaun iha munisípiu balun indika diferensa presu signifikativu husi retallista sira ne’ebé fa’an kombustivel iha estrada-ninin.
Governu Timor-Leste, liuhusi Konsellu Ministru, iha kuarta (01 Abríl) aprova ona alokasaun orsamentu ho montante millaun $168.8 ba sosa kombustivel litru millaun 80 hodi reforsa rezerva nasionál to’o tinan ne’e ramata.
Polítika ida-ne’e hanesan pasu estratéjiku ida atu antesipa interrupsaun potensiál sira ba fornesimentu enerjia globál sira, enkuantu mantein estabilidade folin nian no proteje kbiit sosa públiku nian iha inserteza jeopolítika internasionál nia leet.
Aleinde ne’e, Governu subliña katak folin kombustivel subsidiadu tenke mantein iha limite másimu ne’ebé estabelese ona hodi garante asesibilidade enerjia ba públiku.
Notísia relevante: https://tatoli.tl/2026/04/18/anp-folin-kombustivel-sentru-abastametu-estavel-maibe-retallista-faan-dalan-ninin-aumentu-signifikativu/
Jornalista: Nelson de Sousa
Editota: Maria Auxiliadora
