DILI, 18 Abríl 2026 (TATOLI) – Tuir relatóriu Autoridade Nasionál Petróleu, (ANP), fó sai katak folin kombustível iha sentru abastesimentu sira iha Timor-Leste folin mantein iha limite ne’ebé Governu estabelese, maibé retallista balun fa’an iha munisípiu hatudu aumentu signifikativu.
Tuir relatóriu hosi Autoridade Nasionál Petróleu (ANP) ba períodu 15-17 Abríl 2026, folin gazolina sira iha estasaun kombustível varia husi $1.25 to’o $1.50 kada litru, enkuantu folin gazoleu nian varia hosi $1.30 to’o $1.65 kada litru. Folin gazolina no gazoleu ne’ebé daudaun barratu liu hetan de’it iha Queybubun Laco Combustiveis, munisípiu Bobonaru.
Tuir dadus ne’e, hatudu katak maioria estasaun kombustível sira iha munisípiu sira fa’an kombustível nafatin ho limite másimu ne’ebé maka Governu estabelese, labele liu $1.50 kada litru ba gazolina no $1.65 kada litru ba gazoleu.
Maibé, TATOLI nia observasaun iha munisípiu balun indika diferensa presu signifikativu husi retalista sira ne’ebé fa’an kombustível iha estrada-ninin.
Iha munisípiu Lautein, gazolina retallista fa’an ho folin $2.00 kada litru. Entretantu, iha Vikeke gazolina fa’an ho folin $6.50 kada jerikan (litru 5) no gazolina fa’an ho folin $7.50 kada jerikan (litru 5).
Nune’e Iha Oekusi, gazolina retallu jeralmente fa’an iha botir litru 1.5 ho folin besik $2.00. Nune’e iha nível administrativu, hanesan Atsabe, munisípiu Ermera, gazolina ho botir litru 1.5 folin hahú husi $3.00 to’o $3.50.
Situasaun ida-ne’e indika disparidade folin entre estasaun gazolina ofisiál sira no fa’an retallu sira, liuliu iha área rurál sira ho asesu limitadu ba instalasaun abastesimentu nian.
Entretantu, Governu Timor-Leste, liuhosi Konsellu Ministru, iha kuarta (01 Abríl) aprova ona alokasaun orsamentu ho montante millaun $168.8 ba sosa kombustível litru millaun 80 hodi reforsa rezerva nasionál to’o tinan ne’e ramata.
Polítika ida-ne’e hanesan pasu estratéjiku ida atu antesipa interrupsaun potensiál sira ba fornesimentu enerjia globál sira, enkuantu mantein estabilidade folin nian no proteje kbiit sosa públiku nian iha inserteza jeopolítika internasionál nia leet.
Aleinde ne’e, Governu subliña katak folin kombustível subsidiadu tenke mantein iha limite másimu ne’ebé estabelese ona hodi garante asesibilidade enerjia ba públiku.
Jornalista: Arminda Fonseca
Editór: Rafael Ximenes de A. Belo
