DILI, 19 Abril 2023 (TATOLI)— Partidu Republikanu (PR) sei fo prioridade ba dezenvolvimentu nasaun, iha area turismu, eletrisidade, internet, produsaun, no hadia estrada ne’ebé hahú hosi munisípiu Dili, kuandu hetan fiar hodi ukun ba tinan lima oin mai.
“Iha munisípiu Dili rasik ita hotu haree estrada aat mos barak. Ho nune’e, ami mos sei halo jardin Timor-Leste ne’e hahu uluk husi munisípiu Dili, liu-liu fatin turismu Kristu Rei, ne’ebe abandona no sasan barak komesa aat,” Prezidente Partidu PR João Mariano Saldanha dehan ba jornalista hafoin halo abertura kampaña Parlamentar ho tipu dialogo iha Manleuana Dili, kuarta ne’e.
Tuir nia tenki hahú iha kapital Dili no estrada tenki diak, eletrisidade no tenki lao diak, nomos uma urbanizasaun, iha sentru turismu sira sira nomos sentru admistrasaun publiku, sentru dezenvolvimentu nasional, sentru edukasaun ne’ebe sai prioridade liu ne’e no tenki halo hanesan odamatan ba iha mundu.
“Ne’ebe estrda tenki hadia, eletrisidade no internet tenki diak, para ita bele asesu ho diak. Hau husu ho haraik an, se bele povu fo fiar ba Partido Republikanu ba ukun, ami sei hadia sasan sira ne’e,” Prezidente PR ne’e haktuir.
Prezidenti PR ne’e mos kompremete sei loke kampu servisu barak ba joven sira, nune’e Timor-Leste bele aumenta ninia produsaun.
“Produsaun laos deit natar deit, maibe produsaun hanesan karpintaria no produsaun seluk mak hanesan hakiak karau. Nune’e ita bele hasae produsaun sira ne’e, no atu halo buat sira ne’e presija osan. Nomos ita tenki dada investementu husi estranjeiru mai ita nia rai,” nia esplika.
Tuir nia mos, wainhira atu atu dada investor mai investe iha TL, presija hadia uluk kapital Dili, ne’ebe sai hanesan odomatan ba nasaun liur hodi mai vizita.
“Ne’ebe Dili ne’e importante. Ita tenki hadia estrada no tau matan ba buat sira ne’e. Mota tun bebeik halo ema halai tun sae, halakon uma no sasan, no buat barak mak lakon.Ho ida ne’e PR sei fo prioridade no presija osan barak para atu hadia buat sira ne’e nomos presija servisu barak no hanoin barak para resolve,” nia dehan.
Nune’e mos, Kordenador Munisípiu Dili Partidu PR , Roberto Fernandes, husu ba joven sira iha Dili laran, hodi fo fiar ba PR, atu bele hala’o planu ne’ebe mak iha ona.
Jornalista : Mirandolina Barros Soares
Editora : Armandina Moniz
