DILI, 03 maiu 2023 (TATOLI)—Governu liuhosi reuniaun Konsellu Ministru (KM) aprova rezolusaun Governu nian kona-ba Planu Estratéjiku Dezenvolvimentu (PED) reajustadu ba tinan 2023 to’o 2038, ne’ebé aprezenta hosi Vise Primeiru-Ministru no Ministru Planeamentu no Ordenamentu, José Reis.
“Planu Estratéjiku Dezenvolvimentu antes ne’e iha tinan 2011-2030, agora ita reajusta ona hodi bele antisipa futuru, nune’e iha reajustamentu ne’e ita prevee ba tinan 2023 to’o 2038. Rezolusaun PED ne’e nu’udar produtu importante ida tanba aleinde planu reajustadu, iha kontíudu iha rezolusaun ne’e fó mesajen polítika atu iha kontinuasaun ba governasaun foun sira tuir mai,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.
Notísia relevante : PN no Governu realiza debate ba revizaun PED
Aleinde ne’e, rekomenda ba Governu tuir mai atu hahú prosesu aprovasaun ba lei Enkuadramentu Planeamentu Estratéjiku nian ho objetivu atu kria enkuadramentu estruturadu ba opsaun estratéjika hotu, nune’e atu promove implementasaun PED reajustadu ba tinan 2023-2038.
“Ita hotu hatene planu ne’e vinkula entidade setór públiku hotu no iha medida sira ne’ebé determina ona hosi setór privadu no kooperativu sira,” governante ne’e akresenta.
Nune’e mós, rekomenda ba institusionalizasaun atu halo ezersísiu planu estratéjiku integradu nian, iha longu no médiu prazu, inklui elabora estudu sira hodi kontinua apoia adaptasaun planu ida-ne’e nian ba karakterístika no nesesidade interna nasaun.
“Ita mós rekomenda atu konsolida hodi adopta medida estratéjika sira no hosi rezultadu sira ne’ebé prevee ona iha Planu Estratéjiku Dezenvolvimentu reajustadu, ho informasaun sira ne’ebé iha relatóriu sensu tinan 2022,” Fidelis dehan.
Jornalista : Arminda Fonseca
Editora : Julia Chatarina
