BAUCAU, 20 marsu 2022 (TATOLI) – Komandu Polísia Nasionál Timor-Leste (PNTL) Munisípiu Baucau, detein joven na’in-neen iha ámbitu eleisaun prezidensiál tanba iha intensaun hamosu perturbasaun.
Komandante PNTL Baucau, Superintendente António de Sá, hateten durante votasaun mosu insidente ki’ik hanesan iha joven balun ho kondisaun lanu tenta perturba situasaun bainhira transporta materiál eleisaun ba postu administrativu Baguia.
“Na’in-neen mak ita detein, na’in-rua iha komandu no na’in-haat iha eskuadra Baucau Vila, sira kuaze lanu hotu tenta ba sentru votasaun atu perturuba situasaun entaun parte seguransa asegura tiha,” Komandante PNTL ne’e hateten iha Vila Nova, domingu ne’e.
Postu administrativu Baucau Vila PNTL asegura joven na’in-lima hosi suku Tirililo tanba kondisaun lanu no tenta atu halo perturbasaun iha sentru votasaun hanesan iha área Caisido iha joven balun mesak família uma-laran maibé haksesuk malu tanba apoia difirente ba kandidatura ho kondisaun lanu ikus mai baku malu to’o balun kanek.
Enkuantu iha Betulale, Tirilolo iha joven balun ho kondisaun lanu mós tenta provoka situasaun iha sentru votasaun Eskola Báziku Sentrál (EBC, sigla portugés) Tirilolo maibé membru PNTL konsege kaer no detein 72 oras iha sela.
“Horikalan ita kaptura hotu, agora iha hela sela no sei halo investigasaun hodi haruka ba tribunál,” Superintendente António de Sá akresenta.
Komandu PNT Baucau identifika sentru votasaun balun ne’ebé risku konflitu maibé situasaun ein-jerál iha Baucau kontroladu tanba liuhosi operasaun konjunta entre PNTL no FALINTIL-FDTL halo vijilásia másima iha fatin votasaun, seguransa movel, tátika no patrullamentu terrenu.
Jornalista : Natalino Belo
Editór : Evaristo Soares Martins
