DILI, 04 outubru 2024 (TATOLI)—Prezidente Parlamentu Nasionál (PPN), Maria Fernanda Lay, husu bankada opozisaun FRETILIN ho PLP ne’ebé sai rekerrente ba inkéritu Parlamentár iha área saúde atu iha entendimentu.
Notísia Relevante: Opozisaun husu hala’o inkéritu Parlamentár iha setór saúde
“Ha’u hanoin debate ida horibainhira halo ne’e, rekerente la fó esplikasaun liga ho pontu tolu (objetu inkéritu Parlamentár). Tanba pontu tolu ne’e, keixa tiha ona ba Prokuradória Jerál Repúblika (PJR), sira hateten, aprovizionamentu mais aprovizionamentu saida; ema, edifísiu ka ai-moruk. Ne’ebé, sira hateten ai-moruk, mais como ha’u lahatene, depois forma tiha komisaun ne’e kuandu iha entendimentu, ne’ebé ami como orsamentu tama, ami para lai. Sira bele husu, mais ita halo nusa, para lai, hanoin labele. Ne’ebé, provizóriu, ha’u espera iha entendimentu entre bankada rekerrente ba inkéritu Parlamentár ho bankada ne’ebé husu debate atu to’o konkluzaun ida limite tempu ne’ebé sira tau iha pontu tolu,” PPN hateten ba jornalista sira iha resintu PN, sesta ne’e.
Antes ne’e, reuniaun plenária iha 23 Setembru 2024, PN diskute inkéritu Parlamentár númeru 1/VI(1a) konstituisaun komisaun Parlamentár inkéritu ba aktu Governu iha área saúde, ne’ebé aprezenta husi bankada opozisaun FRETILIN ho PLP, maibé labele halo votasaun tanba meza PN husu hadi’a objetu inkéritu Parlamentár ne’e iha pontu tolu.
Tanba, antes ne’e, bankada FRETILIN hato’o uluk ona keixa ba Prokuradória Jerál Repúblika (PJR) relasiona ho prosesu akizasaun medikamentu la lójika iha inkéritu ne’e atu tan saida ba matéria ne’e.
Tanba ne’e, meza laiha objesaun ba pedidu husi bankada opozisaun maibé husu atu hadi’a objetu inkéritu iha pontu tolu.
Enkuantu, ezerse funsaun fiskalizasaun tuir termu aleina b) númeru 1 iha artigu 2 no númeru 1 artigu 4 iha lei númeru 4/2009, 15 jullu, refere ba rejime jurídiku inkéritu Parlamentár, hodi husu ho obrigatória, konstituisaun komisaun ida inkéritu Parlamentár, ho objetivu avrevigua no apresia politikamente ba aktu responsabilidade Governu.
Maibé, antes ne’e mós, Xefe bankada PLP, Maria Angelina Sarmento, hateten sei la hadi’a objetu inkéritu ne’ebé parte opozisaun hato’o iha pontu tolu ne’e, tanba prazu ramata ona no husu bankada Governu atu iha seriedade rezolve problema saúde ne’ebé durante ne’e iha plenária sempre levanta.
Jornalista : Nelson de Sousa
Editór : Cancio Ximenes
