DILI, 30 agostu 2022 (TATOLI)— Diretór Estabelesimentu Prizionál Prizaun Becora, João Domingos, hateten prizioneiru na’in-467 no guarda prizionál komemora loron konsulta populár ba dala-23, tinan ne’e ho atividade isar Bandeira Repúblika Demokrátika Timor-Leste.
“Iha prizaun Becora, ami sempre fó importánsia hodi komemora loron bo’ot ka loron istóriku sira hanesan, 20 maiu, 30 agostu no 28 novembru ho signifikadu ida katak, maske ita nia maluk sira ne’e dadur, maibé sira mós iha direitu hanesan ho sira seluk, oinsá ita liu hosi atividade sira hanesan ne’e, nune’e sira mós sente bele hola parte iha sosiadade Timor-Leste nian,” Diretór ne’e hateten ba jornalista sira hafoin ramata seremónia isar bandeira ba komemorasaun aniversáriu loron konsulta populár ba dala-23 ne’ebé maka hala’o iha prizaun Becora, tersa ne’e.
Komemora aniversáriu loron kosulta populár 30 agostu 1999 to’o 30 agostu 2022, ba dala-23 prense ho atividade isar bandeira, ne’ebé envolve direta hosi dadur sira na’in- 467, inklui Guarda prizioneiru sira hosi estabelesimentu prizaun Becora.
iha atividade isar bandeira ne’e, nia esplika prizioneiru sira maka envolve direta hanesan pesoál isar bandeira no komandante parada, nune’e mós Guarda Prizioneiru balun maka sai hanesan inspetór seremónia.
Alende ne’e, atividade isar bandeira, iha mós atividade asiste filme ho tema existir e vencer, ne’ebé oferese husi Sentru Audivisuál Max Sthal. Filme ne’e rasik konta kona-ba prosesu luta to’o hetan auto determinasaun Timor-Leste nian.
Entertantu prizioneiru husi estabelesimentu prizionál prizasaun Becora ne’ebé partispa iha seremonia aniversáriu loron konsulta populár tinan ne’e, na’in- 467, kompostu husi kondenadu 381, prizaun preventiva 86 no guarda prizionál sira.
Jornalista: Natalino Costa
Editór : Florencio Miranda Ximenes
