VIQUEQUE, 31 janeiru 2023 (TATOLI)- Serbisu Protesaun Sivíl Munisípiu Viqueque, halo ona distribuisaun materiál rekuperasaun ba vítima dezastre naturál iha tinan 2022, hamutuk uma-kain 118.
“Materiál rekuperasaun ba vítima dezastre naturál ne’ebé akontese iha tinan kotuk, ami distribui hotu ona iha semana kotuk. Balun ami lori direta ba vítima sira no balun mai foti rasik, hodi hadi’a sira nian uma ne’ebé hetan estragu husi dezastre naturál”, Adjuntu Protensaun Sivil munisípiu Viqueque, Cirilio Soares Gomes, hateten ba Agência Tatoli, iha postu Viqueque-Villa, tersa ne’e.
Prosesu distribuisaun materiál rekuperasaun ba uma-kain afetadu sira postu tolu maka hanesan Uatucarbau, Uatulari no Ossu. Entuantu postu Lacluta vítima uma-kain rua ne’ebé sira mai simu iha edifísiu Protesaun Sivil no postu Viqueque-villa.
Tuir dadus, uma-kain afetadu ba dezastre naturál tinan 2022 hamutuk 118, kompostu hosi postu administrativu lima hanesan Viqueque-Vila iha uma-kain 74, Lacluta uma-kain rua, Uatucarbau uma-kain ualu, Uatulari uma-kain 18 no Ossu uma-kain 16.
Materiál rekuperasaun ne’ebé distribuisaun ba vítima dezastre naturál mak hanesan kalen 50, besi baja 50, simente 50, besi beton 50 inklui orsamentu tuir kategoria uma a’at ho totál $1.000, a’at naton $800 no a’at kma’an $650.
Kona-ba vítima dezastre natural iha janeiru 2023, nia dehan Protesaun Sivíl hahú prosesa dokumentu hodi lori ba nasionál.
“Dezastre naturál foin lalais iha fulan janeiru nian laran ne’e, ami submete ona dokumentu ba nasionál hodi prosesa. Kona-ba pakote emerjénsia ami distribui hotu ona ba vítima sira, maibé falta mak materiál rekuperasaun nian”, nia afirma.
Protesaun Sivíl munisípiu Viqueque rejista dadus afetadu ne’ebé akontese iha janeiru 2023 hamutuk uma-kain 76.
Jornalista : Vitorino Lopes da Costa
Editór : Florencio Miranda Ximenes
