VIKEKE, 17 Juñu 2026 (TATOLI)—Xefe Suku Irabin de Baixo, Postu Uatukarbau, Munisípiu Vikeke, José Baptista do Carmo, informa daudaun ne’e mota Irabere sai ameasa ba natar área Baidubu tanba laiha morru protesaun entaun akontese udan mota afeta ba natar no torre eletrisidade óliu pezadu nian ai-riin.
“Foin lalais akontese udan boot ne’e, mota Irabere fera tiha rai nune’e tempu udan mota tun tama fali ba agrikultór sira-nia natar no amesa ba torre óliu pezadu nia ai-rin ne’ebé hela metru lima ne’e bele monu ona. Ha’u sente ida-ne’e sai ameasa boot ba ita-nia agrikultór sira-nia natar Baidubu,” José ba TATOLI iha Postu Uatukarbau, Kuarta ne’e.
Autoridade komunitária ne’e hatutan autoridade halo pedidu ba Institutu Jestaun Ekipamentu ba Dezenvolvimentu Infraestutura, Institutu Públiku (IGEADI, I.P.) halo normalizasaun ba mota ne’ebé ameasa ba agrikultór sira-nia natar.
“Horisehik ne’e ita-nia ekipa IGEADI destaka ona ekipamentu pezadu ba mota Irabere no ekipa téknika husi IGEADI ami la’o hamutuk bá direta haree, maibé sira dehan volume servisu boot bele to’o fulan ruma konklui tanba mota fera distánsia purvolta kilo ida,” nia subliña.
José husu Governu presiza tau morru protesaun ba mota Irabele atu mota labele ameasa agrikultór sira-nia natar.
Tuir dadus, natar Baidubu ho totál ektare 150 ne’ebé pertense iha Suku Irabin de Baixo ne’ebé benefísia populasaun hamutuk 2.624.
Jornalista: Vitorino Lopes da Costa
Editór: Xisto Freitas da Piedade
