VIQUEQUE, 10 agostu 2021 (TATOLI)—Serbisu Edukasaun munisípiu Viqueque, re-ativa ona prosesu aprendizazen iha munisípiu ne’e, maibé programa merenda eskolár sei paradu tanba orsamentu seidauk alokadu ba konta bankária parte serbisu edukasaun munisipál.
“Ita re-ativa ona prosesu aprendizazen, maibé ita seidauk implementa merenda eskolár tanba orsamentu seidauk distribui mai edukasuan munisípiu,” Diretór Serbisu Edukasaun munisípiu Viqueque, Emídio Amaral, hateten ba jornalista Agência Tatoli, tersa ne’e.
Notísia relevante:ESJ Santu Estevão Viqueque hahú ezame periúdu dahuluk
Tuir Emídio Amaral, katak orsamentu ne’ebé aloka ba serbisu edukasaun munisípiu Viqueque hosi fulan janeiru to’o dezembru 2021 ho totál $900.000 ba implementasaun programa merenda eskolár.
Nune’e mós Koodedrnadór eskola Ensinu Báziku Filiál (EBF) 116 Manulak, Rogério Agusto, konsidera merenda eskolár fó vantazen di’ak ba estudante-sira, tanba estudante-sira badinas mai eskola.
Menu ba programa merenda eskolár iha eskola-sira munisípiu ne’e mak hanesan, foos rai, foremungu, ikan no na’an karau.
Jornalista: Vitorino Lopes da Costa
Editór: Cipriano Colo
