VIQUEQUE, 09 outubru 20121 (TATOLI) – Rezultadu kampaña programa vasinasaun iha munisípiu Viqueqe hatudu progresu di’ak tanba komunidade %78.1 simu ona vasina iha doze dahuluk no doze daruak atinje %48.3.
Programa kampaña vasinasaun iha munisípiu Viqueque ne’e lidera Ministru Koordenadór Asuntu Ekonómia (MKAE), Joaquim Amaral no Ministru Transporte no Komunikasaun (MTK), José Agostinho da Silva, hamutuk ho servisu saúdu munisipál aprezenta progresu kampaña vasinasaun loron sanulu nian iha munisípiu Viqueque atinje ona 78.1%.
Ministru José Agostinho agradese ba autoridade lokál sira husi munisípiu Viqueque no pesoál saúde ne’ebé trasa planu hodi luta kontra Covid-19.
“Ita hotu hotu hatene katak moras ne’e ameasa boot ba ita hotu. Tanba ne’e, Primeiru Ministru orienta membru governu sira destaka ba munisípiu sira, iha Viqueque ami mai atu fó apoia ekipa sira iha munisípiu Viqueque loron sanulu atinje ona 78.1%,” Ministru José Agostinho ba informa Agência TATOLI, hafoin halo evaluasaun ba programa vasinasaun, iha salaun Viqueque, sábadu ne’e.
Governante ne’e konsidera apoia morál no lojístika hosi governante na’in-rua motiva komunidade hodi atinje persentajen programa vasinasaun iha Viqueque.
“Ita nafatin esforsu hodi atinje tarjetu ne’ebé nasionál fó 43939, agora daudaun Viqueque atinje pursentu 78.1%,” nia haktuir.
Prezidente komité kampaña vasinasaun kontra Covid-19 Viqueque atuál Adiministradór Munisípiu Viqueque, Januário Sores ‘Boly’, agradese ba governante na’in-rua ne’ebé reforsa ona programa refere nune’e atinje tarjetu.
“Ha’u agradese ba governante na’in rua nia apoia kampaña mai Viqueque hodi halo kampaña no motiva kominidade-sira asesu ba vasina ne’ebé la’o iha Viqueque”, Januario informa.
Iha biban ne’e, Diretór Serbisu Saúde, Francisco de Carbalho, informa daudaun vasina AstraZeneca ne’ebé iha armazein hamutuk 769.
Tuir dadus vasina iha Viqueque husi doze dahuluk 34325 (%78.1), doze daruak 21231 (%48.3), totál ema-ne’ebé seidauk vasina 9614 (%21.9%).
“Seidauk vasina %21.9, ita sei tau estratéjia hodi fó vasina ba komunidade sira ne’ebé seidauk simu vasina sira,” nia katak.
Jornalista :Vitorino Lopes da Costa
Editór : Evaristo Martins
