DILI, 04 jullu 2024 (TATOLI)–Prezidente Konsellu Veteranu Konbatente Libertasaun Nasionál Nasionál, Vidal de Jesus, “Riak Leman”, hateten tuir planu Banku Veteranu nian sei harii iha antigu edifísiu Dolog nia fatin iha Colmera.
Notísia Relevante: Veteranu Coisiri Husu Governu Realiza Inisiativa Harii Banku Veteranu
Nia hateten, Konsellu Veteranu hato’o pedidiu ba Governu no ohin (kinta, 04 jullu 2024) ekipa konjunta lideradu husi Sekretáriu Estadu Toponímia no Organizasaun Urbana (SEATOU), Germano Santa Brites Dias, sobu entigu edifísiu Dolog iha Colmera ne’ebé okupa husi xefe familia hamutuk 31.
“Tanba ida-ne’e mak ami hatama pedidu ba Sekretáriu Estaduno ko’alia mós ho Ministru Justisa hodi hamamuk fatin ida-ne’e atu veteranu sira harii banku,” Prezidente Konsellu Veteranu Konbatente Libertasaun Nasionál Nasionál, Vidal de Jesus, “Riak Leman”, hateten ba jornalista sira.
Riak Leman relata, Governu aprova orsamentu hamutuk $15.000 ba kada familia hamutuk 31 ne’ebé okupa fatin ne’ebá.
“Ami fó $500 ba kada familia atu bele tula sai sira-nia sasán. Osan fó hotu ona ba sira atu sai no buka fatin seluk hodi hela,” nia hateten.
Sekretáriu Estadu Terra Propriedade (SEPT), Jaime Xavier Lopes, hateten sira-nia parte simu pedidu husi veteranu sira iha tinan ida liuba atu harii banku veteranu nian.
Notísia Relevante: CCLN relata preparasaun selebra loron nasionál no kriasaun fundu veteranu ba PM
“Sira haree fatin barak, maibé sira di’ak-liu fatin ida-ne’e serve liu atu harii tanba besik liu ho Banco Nasionál Ultramarino, Banco Mandiri no Banco Repúblika Indonézia (BRI),” Sekretáriu Estadu Terra Propriedade, Jaime Xavier Lopes, hateten.
Tuir nia, veteranu sira-nia osan ne’ebé simu liuhosi subsidiu mensál tuir grau ne’e tau hamutuk, entaun hakarak harii banku.
“Banku veteranu sira atu kontribui ba dezenvolvimentu. Banku barak tebe-tebes maibé atu atende familia ka oan veteranu sira, presiza banku ida atu fó solusaun ba ida-ne’e,” nia dehan.
Governante ne’e hateten, pedidu ne’e aprezenta hosi veteranu sira no terra proriedade halo inspesaun ba fulan ida ona.
Ekipa konjunta lideradu husi Sekretáriu Estadu Toponímia no Organizasaun Urbana (SEATOU), Germano Santa Brites Dias, kinta ne’e, sobu antigu edifísiu Dolog iha Colmera ne’ebé okupa husi xefe familia 31.
Nia hateten, pedidu atu sobu antigu edifísiu ne’e mai hosi instituisaun veteranu nian iha fulan kotuk hodi hatetuk fatin ba konstrusaun foun, maibé antes ne’e parte Governu liuhusi SEATOU halo ona diálogu ho okupante sira iha fatin ne’e.
“Maluk sira hela iha ne’e koopera di’ak ne’e mak ami mai. Ami mai apoiu tuir pedidu Veteranu sira atu normaliza fatin ba konstrusaun edifísiu foun,” Sekretáriu Estadu Toponímia no Organizasaun Urbana (SEATOU), Germano Santa Brites Dias, hateten ba jornalista sira, iha Colmera.
Okupante Manuel da Silva sente triste tanba familia sira hela iha tinan 10 ba leten mak kada xefe família simu de’it osan $500 atu hasai sira-nia sasán no buka fatin seluk atu hela.
Nia hateten, nia parte sei ba hela iha família sira-nia uma, tanba nia parte halo hela tratamentu saúde fase raan kada semana ida da-tolu (3).
Notísia Relevante: Fundu kontributivu Kombatente millaun $35-resin iha konta veteranu
Jornalista : Jesuína Xavier
Editór : Cancio Ximenes
