DILI, 05 jullu 2024 (TATOLI)—Komisáriu Komisaun Anti-Korrupsaun (CAC, siglá portugés), Rui Pereira dos Santos, promote sei fó prioridade atu investiga kazu Ró Hakslok ho kazu pendente sira seluk ne’ebé rejista iha CAC to’o agora seidauk finaliza nia investigasaun.
Notísia Relevante: CAC rona ona sasin 20 ba kazu ró Haksolok
Nia dehan, nu’udar komisáriu ne’ebé hetan fiar husi Parlamentu no Governu, ba kna’ar CAC nian ne’e halo investigasaun ba asuntu korrupsaun, tanba ne’e kazu sira-ne’ebé pendente no kazu sira-ne’ebé hetan atensaun públiku ne’e komisáriu sei tau iha prioridade atu finaliza sira-nia investigasaun.
“Hanoin kazu pendente ne’e la’ós buat foun ona.Ezemplu, balun dehan Ró Haksolok halo nusa, aviaun (ZEEMS), faan rai Fulolo, Kámara Konta nia auditória, Cesta Básika ne’e halo nusa ho tan kazu boot sira seluk. Ha’u seidauk ba haree kazu hira mak investiga ona iha CAC ne’eba, investogadór sira iha tempu (Komisáriu CAC) Sergio Hornai ninian, no nu’udar komisáriu tenke haree fila-fali file sira-ne’e, no ne’ebé prontu ona ba liu ona iha Ministériu Públiku no ne’ebé seidauk presiza halo serbisu,” Rui Pereira dos Santos hateten hafoin simu pose ba kna’ar nu’udar komisáriu CAC husi Prezidente Parlamentu Nasionál iha Parlamentu Nasionál, sesta ne’e.
Tanba ne’e, nia dehan, nu’udar komisáriu CAC labele ko’alia barak maibé serbisu lai mak hafoin haree ninia rezulatdu.
Importante liu, nia hateten, ba kazu sira-ne’ebé pendente no kazu sira-ne’ebé hetan atensaun husi públiku ne’e sei fó prioridade atu finaliza nia investigasaun hodi lori prosesu tuir lei ne’ebé iha.
Notísia Relevante: PM Xanana deside halo auditória internasionál ba ró Haksolok-aviaun ZEESM
Jornalista : Nelson de Sousa
Editór : Cancio Ximenes
