BAUKAU, 23 Marsu 2026 (TATOLI)—Sala Intensive Care Unit (ICU) iha Ospitál Rejionál Eduardo Ximenes (HoREX-sigla portugeza) sei hahú funsiona iha finde Marsu ne’e.
Diretór Ezekutivu HoREX Baukau, Claudino Ximenes esplika ICU HoREX iha atualmente seidauk utiliza tanba durante ne’e menus rekursu umanus mezmu sala referidu finaliza konstrusaun iha fulan-Agustu tinan 2022 inklui kedas ho fasilidade ne’ebé kompletu.
“Durante ne’e ita labele utiliza tanba de’it rekursu umanu, maibé hafoin treinamentu ita uza ona iha fulan ida-ne’e,” Diretor Ezekutivu HoREX Baukau, Claudino Ximenes hateten iha ninia kna’ar fatin, Segunda ne’e.
Claudino Ximenes relata Governu liuhusi Ministeriu Saúde (MS) rekruta ona médiku no enfermeiru hamutuk na’in-sanulu koloka iha HoREX reforsa sistema atendimentu serbisu iha sala ICU HoREX no kontinua hasa’e kapasitasun no sei finaliza instalasaun eletrisidade antes hahú funsiona no utiliza ICU iha HoREX Baukau.
Aleinde ne’e, pesoál saúde hirak-ne’e sei halo atendimentu iha ICU ho kapasidade kama pasiente hamutuk neen iha-ne’ebé kompleta ho ekipamentus bainhira sala ICU HoREX nune’e bele redús kazu transferénsia ba Ospitál Nasionál Guido Valadares (HNGV-sigla portugeza).
“La’ós kazu hotu-hotu ita tau iha-ne’ebá. Ita laiha espesialista tanba ne’e pasiente balun tenke transfere ba HNGV tanba presiza halo diagnóstiku,” Claudino akresenta.
Entretantu, ICU HoREX Baukau hahú lansamentu iha tinan finde tinan 2021 no determina iha inísiu 2022 iha-ne’ebé apoia husi parseiru internasionál USAID ho valór orsamentu hamutuk millaun $2,3 no obra referida konstrui husi forsa militár Komandu Indopasífiku Amérika.
Jornalista: Natalino Belo
Editór: Xisto Freitas da Piedade
