DILI, 25 janeiru 2023 (TATOLI)— Gabinete Primeiru Ministru, liuhosi Servisu Apoiu Sosiedade Sivíl no Auditoria Sosiál, iha Gabinete Primeiru Ministru (SASCAS, sigla portugés), inagura sentru treinamentu integradu dahuluk ba ema ho defisiensia tilun iha suku Fatuquero, postu administrativu Railaco, munisípiu Ermera.
Diretor Ezekutivu SASCAS, Edvin Soares Noronha, agradese ba Diretora Ezekutiva Klibur Defisiénsia Tilun iha Timor-Leste (KDT-TL) Crecencia Madeira de Jesus ne’ebe maka hetan formasaun defisiénsia tilun nian iha Agape, ikus mai bele harii rasik ninia organizasaun hodi bele akumula ema sira ho defisiensia hanorin ho lian jestu ne’ebé la depende ona ba iha ema estranjeiru sira.
“Ha’u agradese ba Diretora ezekutiva KDT-TL, Crecencia Madeira de Jesus tanba bele tuir ona formasaun iha Agape no ikus mai bele harii rasik sentru ba ema ho defisiénsia tilun. Ida ne’e importante tebes tanba lian jestuariu ne’e lafasil, entaun ho sentru ida ne’e bele ajuda tan maluk defisiénsia tilun sira hodi aprende tan lian jestu ne’e,” Edvin Soares Noronha dehan ba Agência Tatoli, iha nia knaar-fatin, Palásiu Governu, Dili, kuarta ne’e.
Nia dehan, Governu presiza apoiu KDT-TL harii sentru formasaun tanba, tuir dadus hatudu iha Timor-Leste defisiénsia barak liu ne’e maihosi munisípiu Ermera, Baucau, tuir Dili.
“Ho sentru formasaun ne’e, bele apoiu ita-nia maluk defisiénsia sira, maibé mós ba maluk sira ne’ebé la’os ho defisiénsia bele aprende lian jestuári hodi bele konversa ho ita-nia maluk defisiénsia,” nia dehan.
Nia dehan, sentru treinamentu integradu ba ema defisiénsia ne’e rasik lansa fatuk dahuluk iha loron 16 agostu 2022 no hetan inagura iha loron 24 janeiru 2023.
“Orsamentu ne’ebé ita apoiu ba sentru treinamentu ne’e rasik hamutuk $10.000,” nia dehan.
Bazeia ba komunikadu ne’ebé SASCAS hatun iha nia pájina ofisiál, Diretora ezekutiva KDT-TL, Crecencia Madeira de Jesus, hateten, sentru treinamentu defisiénsia tilun ne’e rasik, harii hosi KDT-TL maibé la’os ba ema defisiénsia de’it, maibé mós ba ema la ho defisiénsia atu bele aprende lian jestu nune’e bele fasilita maluk defisiénsia sira.
“Tanba tuir dadus ne’ebe iha, munisipiu Ermera defisiénsia barak liu kuaze 4.000, ho dadus ne’e liuhosi sentru treinamentu ne’e bele fasilita sira,” nia hateten.
Jornalista : Arminda Fonseca
Editora : Armandina Moniz
