BAUCAU, 23 fevereiru 2022 (TATOLI) – Ministériu Saúde liuhosi servisu saúde munisipál Baucau hala’o advokasia ba pesóal saúde sira antes realiza kampaña imunizasaun Pfizer ba labarik idade 12 to’o 18 iha Baucau.
Xefe Departementu Jestaun Programa Saúde Baucau, Cristiano Cipriano Belo, hateten, sorumutu kuarta ne’e, parte orientasaun ba pesóal saúde sira kona-ba implementasaun kampaña vasinasaun Pfizer ba labarik idade 12 to’o 18 iha Munisípiu Baucau.
“Objetivu mak garante labarik idade 12 to’o 18 partisipa vasinasaun atu halo prevensaun ba aan relasiona ho pandemia surtu covid-19,” Xefe departementu jestaun programa hateten iha Vila Antiga, kuarta ne’e.
Tuir planu implementasaun vasina ba labarik sira sei hala’o hafoin advokasia ba pesóal saúde iha nível munisípiu, postu administrativu hafoin iha eskola ba estudante sira no kontinua kedas fó vasinasaun ba labarik sira.
Iha vasinasaun refere mós sei hetan autorizasaun hosi inan-aman hosi estudante ka labarik sira-ne’ebé sei justifika hosi karta aseitasaun nune’e bele antesipa mosu dezintendimentu entre pesóal saúde no inan-aman hosi labarik sira.
“Semana oin sei halo advokasia nível munisípiu, loron 1 marsu iha postu administrativu hotu no sei kontinua iha nível eskola bele ona hahú vasina,” Cristiano akresenta.
Tuir planu MS mós sei hala;o vasina booster tipu Pfizer ba komunidade sira-ne’ebé mak vasina ona doze daruak AstraZeneca nu’udar meiu atu hasa’e liután imunidade hasoru ameasa surtu covid-19 iha Baucau.
Xefe Seksaun Promosaun Edukasuan Saúde Ministériu Saúde (MS) Nasionál, Mizilijia Vidal hateten, governu lansa ona kampaña vasinasaun Pfizer ba labarik sira foin lalais ne’e iha Liquiçá nune’e sei habelar ba munisípiu seluk inklui Baucau.
“Xave importante mak iha eskola tanba ita-nia tarjetu ba labarik sira tinan 12 to’o 18, maioria labarik sira ne’e iha eskola,” Mizilijia Vidal hateten.
Tuir dadus totál estudante ne’ebé sei partisipa iha kampaña Pfizer hamutuk na’in- 21.298 hosi tótal eskola 174 iha sentru saúde sia iha Baucau.
Jornalista : Natalino Belo
Editór : Evaristo Soares Martins
