BAUCAU, 15 dezembru 2022 (TATOLI) – Governu liuhosi Sekretaria Estadu Kooperativa kinta ne’e, realiza semináriu iha Baucau hodi identifika progresu no dezafiu nune’e bele implementa programa iha tinan 2023.
Sekretáriu Estadu Kooperativa, Elizário Perreira, esplika, formasaun refere ho tema kooperativa nu’udar espíritu ba dezenvolvimentu ekonomia kreativu família no sosiadade ne’ebé partisipa hosi dirijente kooperativa, autoridade munisípiu Baucau no administrasaun postu administrativu sira.
“Hosi identifikasaun dezafiu mak halo ita kreativu atubele introdús solusaun ne’ebé pozitivu ka progresivu hosi fó benefísiu ba ita-nia povu no família sira tomak,” Sekretáriu Estadu Kooperativa hateten iha Vila Nova, kinta ne’e.
Liuhosi semináriu ne’e hodi hato’o progresu no dezafiu SeKoop hasoru durante períodu ida-ne’e no rona dezafiu hosi munisípiu hasoru atu buka solusaun hodi implementa programa iha orsamentu 2023 nian.
Nune’e mós rona preokupasaun no problema ne’ebé parte dirijente sira hasoru hodi buka solusaun iha tinan 2023.
Iha tinan 2022 totál orsamentu hamutuk millaun $40 ne’ebé implementa programa hanesan sesta bázika iha munisípiu ualu inklui RAEOA ne’ebé iha faze distribusaun atinje ona pursentu 44 no iha fulan-dezembru ne’e aselera hodi finaliza.
Enkuantu dezafiu iha parte tékniku ne’ebé tarde tanba kumpre lei no kompañia balun seidauk kumpre misaun nune’e parte SeKoop halo parseria ho Komisaun Antí Korrupsaun (KAK), PDHJ no AIFAESA.
Orsamentu jerál ba SeKoop iha tinan 2023 hamutuk millaun $4.9 ne’ebé sei aloka ba programa importante sira hanesan fortalesimentu institusionál, kapitalizasaun ba akompañamentu no superviziona inklui auditoria.
Nune’e mós kriasaun kooperativa, edukasaun no formasaun hodi fó importánsia ba kooperativa produsaun sira hodi hasa’e diversifikasaun ekonomia.
Jornalista : Natalino Belo
Editór : Evaristo Soares Martins
