DILI, 15 Setembru 2025 (TATOLI) – Timor-Leste loke ofisialmente Semana Abilidade Internasionál daruak ho tema “Abilidade iha Asaun: Impulsiona Inovasaun ba Integrasaun Globál”, ne’ebé realiza iha Sentru Konvensaun Dili (CCD), entre loron 15 no 19 Setembru 2025.
Eventu ne’e organiza husi Institutu Nasionál ba Dezenvolvimentu Mão-de-Obra, Institutu Públiku (INDIMO, I.P) ne’ebé hala’o iha formatu íbridu, hodi permite partisipasaun fízika no virtuál ba partisipante internasionál no nasionál sira.
Diretora Ezekutiva INDMO, Isabel de Lima, hato’o nia agradesimentu ba prezensa partisipante sira, liuliu delegadu kuaze 50 husi nasaun sira hanesan Austrália, Malázia, Indonézia, Brunei Darussalam, Xina, no Portugál.
Nia hateten delegadu sira-nia prezensa maka demonstrasaun klara ida husi sira-nia kompromisu fahe ba dezenvolvimentu abilidade sira, inovasaun, no integrasaun globál.
“Husi esperiénsia sira ne’e, ami transforma sai ideia sira ba solusaun konkreta sira, liuhusi atividade oioin ne’ebé reflete dinámika no dezenvolvimentu husi Technical and Vocational Education and Training (TVET) iha Timor-Leste”, Isabel de Lima hateten iha CCD, ohin.
Nia subliña katak importánsia husi fórum ne’e mak simpóziu sira no sesaun aprendizajen ne’ebé aborda dijitalizasaun, mudansa klimátika, literasia dijitál, mobilidade traballadór, no planeamentu polítika bazeia ba evidénsia.
Husi fórum ne’e ba iha loron daruak nian sei destaka programa mak kona-ba indústria TVET ne’ebé sei halo revizaun no aliña padraun kompeténsia sira hodi hametin ligasaun entre edukasaun vokasionál no indústria nian.
Aleinde ne’e, iha mós Expo Teknolojia TVET nian durante loron haat hodi hatudu inovasaun sira ikus liu husi empreza liu 20, instituisaun TVET sira, no organizasaun internasionál sira ne’ebé forma hela futuru abilidade sira-nian.
INDMO ofisialmente anunsia katak eventu ida-ne’e marka signifikativu ida ba Timor-Leste. Nasaun sei sai uma-na’in ba Asembleia Jerál WorldSkills Ázia ba da-10 iha 2026, iha konjunsaun ho Kompetisaun Nasionál Abilidade 2026 nian.
Iha eventu ne’e, iha mós asina Memorandu Entendimentu (MoU) rua, entre INDIMO no Human Resourses Development Corporation (HRD Corp) Malázia no INDIMO ho South Australia Skills Council (SASC), atu apoia dezenvolvimentu Índise Formasaun Nasionál ida ba Timor-Leste.
Iha biban ne’e, Koordenadór-Jerál Ministériu Koordenadór ba Asuntu Ekonómiku (MKAE), Jorge Martins, ne’ebé reprezenta Vise-Primeiru-Ministru Timor-Leste, Francisco Kalbuadi Lay, hateten Governu fó apoiu tomak ba dezenvolvimentu TVET nian.
Nia subliña edukasaun profisionál la’ós de’it preparasaun ba serbisu, maibé fundasaun ba dezenvolvimentu nasionál no Timor-Leste nia integrasaun iha ekonomia mundiál.
“Ita-nia jerasaun foun maka ita-nia nasaun nia rekursu ne’ebé iha valór liu. Liuhusi abilidade no inovasaun, ita sei harii futuru ida ne’ebé inkluzivu, inovadór, no iha ligasaun lobál”, dehan.
Nia mós destaka atu halo diversifikasaun ekonómika, aleinde setór petróleu no gás, dalan ida mak liuhusi agrikultura, turizmu, manufatura, no simultaneamente harii kapasidade dijitál amigavel ba ambiente.
“Semana Internasionál ba Abilidade daruak ida-ne’e hein atu sai hanesan momentu estratéjiku ida atu hametin Timor-Leste nia pozisaun nu’udar sentru ba eselénsia abilidade nian, hasa’e kolaborasaun rejionál no globál, no loke oportunidade foun ba foinsa’e sira hodi kontribui ba dezenvolvimentu sustentavel no integrasaun globál”, konklui.
Notísia relevante: Timor-Leste organiza Semana Internasionál Abilidade nian iha semana oin
Jornalista: Arminda Fonseca
Editora: Maria Auxiliadora
