DILI, 17 Setembru 2025 (TATOLI) –Husi fulan-Abríl to’o Setembru tinan ne’e, Sentru Saúde Ermera fó ona vasina ba ema pozitivu vírus raiva hamutuk 200-resin, Diretór Servisu Sentru Saúde Ermera-Atsabe, António de Fátima relata.
“Husi vírus raiva ne’e iha ema na’in-haat mak ita rejistu mate. Kazu ne’ebé mak husi asu tata, kuaze halo vasina ba sira-ne’ebé hanesan ita konsidera pozitivu, no ita fó vasina ba na’in 200-resin. Ida-ne’e hahú husi Abríl kuandu kazu primeiru mosu to’o mai agora,” nia dehan ba TATOLI, iha Delta Nova, kuarta ne’e.
Ezekutivu ne’e akresenta husi ema na’in-haat mate ne’e tanba família la lori lalais ba fasilidade ka sentru saúde sira iha Ermera.
“Tanba ne’e mak ami Ermera mós estabelese ona ekipa TaskForce ne’ebé mak kompostu husi Prezidente Autoridade Munisípiu, ne’ebé tutela mós husi servisu saúde nunisípiu, no agrikultura tanba sira na’in-rua ninia servisu ne’e importante loos,” nia esplika.
Notísia relevante:Bobonaru-Ermera-Kovalima-RAEOA hato’o pedidu husu vasina antí Raiva ba INFPM
Nia dehan pasiente virus raiva pozitivu ne’e kuaze ema ho idade 18 mai kraik, labarik no ferik-katuas sira.
“Iha Ermera kuaze asu sira tata ema ne’e, sira seidauk hetan vasina, no bele konsidera asu ne’e asu badiu, tanba pontu entrada sira-ne’e sei livre hela, entaun ema faan asu ba-mai no asu movimentu ba mai,” nia akresenta.
António de Fátima hatutan ba asu sira-ne’ebé vasina ona ne’e komunidade labele tauk, no husu ba komunidade sira ne’ebé haki’ak asu tenke tau matan nafatin, no asu tenke vasina. Totál asu ne’ebé simu ona vasina ne’e hamutuk 902.
Jornalista: Osória Marques
Editór: Rafael Ximenes de A. Belo
