OÉ-CUSSE 25 maiu 2023 (TATOLI) – Sekretariadu Tékniku Administrasaun Eleitorál (STAE) rejista eleitór 9,978 iha Rejiaun Administrativa Espesiál Oé-Cusse Ambeno (RAEOA), la konsege ezerse direitu votu iha loron eleisaun parlametár, 21 maiu tinan ne’e.
Notísia relevante: CNRT manán iha Oé-Cusse ho votu 19,624
Diretóra STAE Oé-Cusse, Luiza da Costa, informa, lista ne’ebé Governu aprova iha Jornál Repúblika, totál eleitór elijível atu tuir vota iha Oé-Cusse, hamutuk 54,291 maibé iha 44,313 de’it mak konsege ezerse direitu votu no 9,978 la konsege vota.
“Hosi totál 9,978 ne’e, eleitór balu mate tiha ona, balu ferik no katuas liu ona, ne’e maka tama iha númeru eleitór la tuir vota iha eleisaun parlamentár ne’e,” Diretora STAE Oé-Cusse, Luiza da Costa, informa ba Agência Tatoli iha Oé-Cusse, kinta ne’e.
Nune’e mós kona-bá eleitór 9,978 la konsege vota ne’e, tanba iha lei eleitorál mós la bandu no la obriga sidadaun hotu atu tuir vota.
“Maibé tuir loloos, ita tenke kumpri ita-nia devér nu’udar sidadaun timoroan loloos tenke vota, no dadus ne’e mós, autoridade komunitária sira seidauk submete lista óbitu mai iha STAE, atu ita hasai no balu mós hela iha estranjeiru, ne’e maka hamutuk 9,978 la konsege vota ne’e,” nia katak.
Notísia relevante: STAE Oé-Cusse hahú taka lista iha suku ba eleitór sira konfirma naran
Purtantu, kona-bá votu nulu iha Oé-Cusse, hamutuk na’in-366, nune’e STAE konsidera balu votu doubru ka vota iha partidu rua, no balu asina de’it maibé iha fatin rua, nune’e STAE konsidera tama votu nulu.
“Antes ita halo ona esforsa, rezultadu mak taxa partisipasaun ne’e aumenta, iha eleisaun prezidensiál la vota hamutuk rihun 12-resin, maibé agora tún ba 9,978,” nia tenik.
Dirijente STAE Oé-Cusse, konfirma, durante ne’e STAE esforsa hala’o sensibilizasaun liuhosi edukasaun votante, iha nível suku to’o sub-rejiaun inklui fatin públiku, maibé sidadaun balu seidauk iha konsiénsia hodi vota ho loloos.
Kona-bá votu branku, ne’e katak, eleitór sira partisipa duni tama to’o kabina votu maibé la vota ida, nia númeru ne’e hamutuk 84, ba votu reklamadu nian ne’e iha 29, tanba laiha aseitasaun hosi fiskál partidu polítiku iha sentru votasaun ne’e akontese iha kontajen votasaun.
Nune’e mós kona-bá votu rejeitadu ne’e iha tolu (3) tanba boletín votu laiha legalidade atu asina no karimbu hosi STAE molok tama ba kabina votu, signifika boletín votu ne’e moos hela laiha karimbu STAE iha kotuk.
“Entaun ida-ne’e mós afeta ba taxa partisipasaun, maske antes ne’e ita esplika hotu buat sira-ne’e ba eleitór sira, maibé kada tinan sempre akontese hanesan ne’e,” nia katak.
Notísia relevante: Responsabilidade STAE ramata, CNE kontinua halo verifikasaun ba votu reklamadu sira
Jornalista : Abílio Elo Nini
Editór : Evaristo Soares Martins
