DILI, 12 abríl 2024 (TATOLI) – Tribunál Rekursu deside ona iha kinta-feira (11/04) hodi absolve arguidu António da Conceição ‘Kalohan’ hosi pena efetivu prizaun tinan lima ba krime partisipasaun ekonomia iha negósiu.
Defeza hosi arguidu António da Conceição ‘Kalohan’ Advogadu Privadu Pedro Camoes, dehan Tribunál Rekursu iha kinta (11/4) horseik hasai ona desizaun hodi absolve António Kalohan hosi pena prizaun efetivu tinan lima ba krimi Partisipasaun Ekonómia iha Negósiu.
“Sim, Tribunal Rekursu hasai ona desizaun ba ami-nia rekursu ne’ebé foin daudaun ha’u hatama. Tribunál Judisiál Primeiru Instánsia Dili notifika uluk ha’u nia kliente António da Conceição, iha notifikasaun ne’e, Tribunál Rekursu absolve ha’u-nia kliente hosi pena efetivu prizaun tinan lima ba krime partisipasaun ekonomia iha negósiu ne’ebé Ministeriu Públiku imputa ba ha’u-nia kliente”, Defeza hosi arguidu António da Conceição ‘Kalohan’ Advogadu Privadu Pedro Camoes hateten ba Tatoli via telefone, sesta ne’e.
Nia dehan, Tribunál Rekursu haree laiha faktu sufisiente ne’ebé kondena antigun Ministru Komérsiu Indústria (MCI) ba pena efetivu tinan lima liga ba krime partisipasaun ekonomia iha negósiu ne’ebé Ministeriu Públiku imputa ba nia.
“Ida-ne’e mak desizaun ikus hosi Tribunál Rekursu ba ami-nia rekursu ne’ebé foin daudaun ami hatama ba Tribunál Primeira Instánsia hodi kontesta desizaun Tribunál Judisiál Primeira Instánsia”, nia afirma.
Iha sorin seluk, Defeza arguidu hosi Apolinario Marcal Masquerinhas hateten, Tribunál hasai ona desizaun ba rekursu ne’ebé momentu hatama iha Tribunal Primeira Instánsia hodi kontesta desizaun ne’ebé kondena nia kliente Apolinario dos Santos ho pena efetivu prizaun tinan haat.
“Ha’u foin mak simu notifikasaun hosi Tribunál Judisiál Primeiru Instánsia Dili ba ami nia rekursu ne’ebé foin daudaun ami hatama. Hosi akordaun Tribunál Rekursu nian ba rekursu ne’e absolve totál arguidu António Kalohan hosi pena prizaun efetivu tinan lima, enkuantu ha’u-nia kliente Apolinario nian iha Tribunál aplika hamenus nia pena efetivu hosi tinan haat ba pena efetivu tinan tolu no suspende ba tinan lima”, nia afirma.
Jornalista: Natalino Costa
Editor : Zezito Silva
