OÉ-CUSSE, 06 outubru 2023 (TATOLI – Iha Trimestre datoluk, hahú hosi fulan jullu to’o fulan setembru 2023 ne’e, Departamentu Rejionál Transporte Terrestre (DRTT) Rejiaun Administrativa Espesiál Oé-Cusse Ambeno (RAEOA), rekolla reseita $33,496.00 ba kofre Estadu liuhosi tratamentu dokumentu ba transporte sira iha Oé-Cusse Ambeno.
Notísia relevante: DRTT Oé-Cusse presiza aumenta rekursu umanu no fasilidade
Xefe Departamentu Transporte Terrestre Rejiaun Oé-Cusse Ambeno, Silvestre Sila Teme, informa, reseita ne’e kobre mai hosi tratamentu dokumentu transporte sira hanesan, karta kondusaun renova rejistu no rejistu foun, no renova dokumentu inspesaun.
Durante fulan tolu iha trimestre datolu ne’e maka ita hetan $33,496.00, reseita ne’e rekolla liuhosi rejistu inspesaun DSPL, no lisensa tranzitu,” Silvestre Sila Teme, ko’alia iha Oé-Cusse, sesta ne’e.
Nia informa, ema-ne’ebé tratamentu dokumentu hirak-ne’e iha trimestre datolu nia nia laran hamutuk ema 2.060 komposta hosi rejistu hamutuk na’in-246, inspesaun na’in-952, renova no halo karta kondusaun na’in-421, lisensa tranzitu na’in-255 no trata karta DSPL na’in-186.
Xefe Departamentu ne’e akresenta, trimestre dahuluk hahú hosi janeiru to’o marsu konsege rekolla $28,265.00 no iha trimestre daruak hosi fulan abríl to’o juñu rekolla $23,063, no iha trimestre datoluk iha mudánsa sa’e ba $33,496.00.
Eentretantu, liga ho atendimentu dokumentu parte DRTT Oé-Cusse durante ne’e, iha kooperasaun di’ak ho Polísia Unidade Tranzitu Oé-Cusse, maibé kona-bá reseita infrasaun tranzitu la inklui iha reseita DRTT nian.
“Sé bainhira sira kaptura motorista deteta dokumentu la tuir estandár, sempre komunika mai iha Departementu transporte, ne’ebé komunikasaun durante ne’e la’o di’ak,” nia katak.
Notísia relevante: Tinan 2022, DRTT Oé-Cusse hatama rihun $89-resin ba kofre Estadu
Jornalista: Abílio Elo Nini
Editór: Evaristo Soares Martins
