DILI, 06 dezembru 2023 (TATOLI)–Xefe suku Soba, postu administrativu Laga, munisípiu Baucau, Francisca Monica de Jesus Soares, hateten konstrusaun Uma Naroman ba Povu (UNP) hamutuk 12 iha suku Soba to’o agora seidauk finaliza tanba falla fornese mobiliáriu hanesan odamatan, janela no rifas.
“Uma Kbiit Laek ka Uma Naroman ba Povu (UNP) 12 iha suku Soba seidauk finaliza. UNP 12 ne’e uma sia (9) implementa iha 2021 nian no tolu (3) seluk implementa iha 2022 nian,” Xefe suku ne’e hateten ba Agência Tatoli, hafoin partisipa iha konferénsia nasionál no selebrasaun aniversáriu PNDS ba dala-10 iha Sentru Konvensuan Dili (CCD, sigla portugés), tersa ne’e.
Konstrusaun Uma Naroman ba Povu (UNP) ba períodu dahuluk ne’e ninia konstrusaun atinje ona 75% no konstrusaun ba períodu daruak ne’e ninia prosesu tama ona ba 85%.
“Dezafiu ba ita mak fornesedór sira tanba dala ruma ita fó kotasaun ba sira asina, depois atu fornese sasán kle’ur loos. Eezemplu fornesedór odataman nian ne’ebé ladún iha kontribuisaun ho ita, tan ida-ne’e mak uma ne’e seidauk entrega,” nia esplika.
Nune’e, tuir nia, bainihira atu konstrui uma ida ne’e nia parte sempre husu ba badaen atu koordena ho tékniku, nune’e labele halo tuir badaen nia hakarak tanba kuandu la kolabora ho tékniku mak nia rezultadu sei ladún di’ak.
Kona-ba programa PNDS nian, nia dehan, di’ak tebes tanba fó vantajen boot ba komunidade mak suku Soba hetan benefísiu iha 2014 mak sede aldeia ida iha área remota maske estrada laiha, maibé ho komunidade nia kontribuisaun hodi lalin sasán konstrusaun.
Iha 2015, PNDS dada bee-moos ba komunidade no hadi’a sede suku soba nian, suku ne’e mós halo manutensaun ba estrada, halo garajen no mós tau pasadeira iha mota.
“Entaun, mai tinan 2022, ha’u rasik halo proposta ba IGEADE, I.P hamutuk ho PNDS no ikus ami asesu duni ba estrada. Programa PNDS nia atividade durante ne’e mak bee-moos entrega ona, ne’e reziliénsia ekonómia ba komunidade no aldeia rua mak seidauk asesu,” nia hateten.
Totál populasaun iha suku Soba hamutuk ema 2.332 ne’ebé hela iha aldeia neen (6) mak Asa-nunu, Boleha, Butufalo, Fatiliri, Heu-uai no Laicua.
Jornalista : Osória Marques
Editór : Cancio Ximenes
