BAUCAU, 27 juñu 2023 (TATOLI) – Konsellu Munisipál Kombantente Libertasaun Nasionál (CMCLN, sigla Portugés) Baucau, husu Governu dasia atu kumpre promesa polítiku hodi implementa programa no lori dezenvolvementu ba povu.
Sekretáriu jerál CMCLN Baucau, Manuel ‘Alari’ da Costa Soares, esplika, partidu rua hanesan CNRT no PD bainhira ukun hamutuk tenke serbí ho fuan nune’e bele implementa promesa durante iha períodu kampaña eleitorál.
“Ita husu atu programa hotu ne’ebé promete ona iha kampaña tenke kumpri,” Sekretáriu jerál CMCLN Baucau informa ba Agência TATOLI iha Vila Antiga, tersa ne’e.
Maneira atu dezenvolmentu to’o iha povu mak dahuluk tenke kolabora ho Parlamentu Nasionál (PN) atu halo revizaun ba lei pensaun vitalísia ne’ebé konsideradu hanesan hamosu diferensa ekonomiai ha Timor-Leste.
Alende ne’e, setór tolu hanesan edukasaun, saúde no agrikultura presiza fó atensaun tanba durante ne’e povu iha baze kontinua halerik hanesan konstrui ospitál internasionál hodi iha atendementu saúde, kualidade edukasaun no produsaun ai-haan.
“Ita-nia esperansa katak sira bele realiza, bazea ba Prezidente Repúblika nia hanoin atu fó pose ba membru governu ne’ebé iha kualidade,” Alari akresenta.
CMCLN Baucau mós husu ba governasaun foun atu halo revizaun ba lei subsidiu veteranu liuliu kona-bá direitu tanba atuál família iha direitu reprezenta na’in-ida atu simu subsídiu bainhira família mate liu na’in-ida.
CMCLN Baucau sei rekomenda ba ministériu asuntu veteranu atu liuhosi konsellu ministru deside pozisaun konsellu veteranu nu’udar sentral ba polítika hodi labele iha impase politika iha futuru.
Nune’e mós husu atu aselera implementasaun poder lokál no desentralizasaun administrativa, lei eleisaun munisipál nune’e bele fó podér ba autoridade munisipál hotu atu foti desizaun no define prioridade ba dezenvolvimentu iha kada munisípiu.
Tuir ajenda Prezidenti Republika, Primeiru Ministru no membru IX governu sei simu pose iha loron sábadu, 01 jullu iha Palásiu Prezidensiál Nicolau Lobato, Dili.
Jornalista : Natalino Belo
Editór : Evaristo Soares Martins
