BAUCAU, 23 maiu 2023 (TATOLI) – Sekretariadu Tékniku Administrasaun Eleitorál (STAE) konsidera votu nulu sei kontinua sa’e durante eleisaun parlamentár tinan-ne’e iha Baucau.
Rezultadu apuramentu fó-sai katak, munisípiu Baucau votu nulu hamutuk 1.238 hosi tótal partisipasaun 75.438, nune’e STAE Baucau konsidera eleitór sira mak laiha konsiénsia tanba barak liu boletín votu asina no hili partidu rua.
Nune’e mós durante preparasaun eleitór sira laiha interese partisipa edukasaun votante ne’ebé hala’o, hahú hosi aldeia no suku iha munisípiu Baucau.
“Votu nulu sei aas katak eleitór barak mak seidauk ezerse sira-nia direitu ho loloos tanba barak mak asina,” Diretór STAE Baucau, Natividade Freitas Guterres hateten iha Vila Nova, tersa ne’e.
Kona-bá eleitór hamutuk rihun 23-resin ne’ebé la vota, STAE Baucau konsidera lei la obriga sidadaun hotu atu vota, autoridade suku seidauk entrega dadus óbitu ba STAE atu elemina hosi lista votante no sidadaun barak mak sai ba ra-li’ur.
Enkuantu, votu branku katak ema partisipa maibé lakohi ezerse direitu hamutuk 364, reklamadu katak prezidente sentru votasaun foti la hetan aseitasaun hosi fiskal partidu hamutuk 48, votu rejeitadu katak boletín la asina no karimbu hosi ofisiál sira .
“Ida-ne’e mak afeta ba taxa partisipasaun,” Natividade Guterres akresenta.
Notísia relevante: FRETILIN manán iha Baucau ho votu 29.611
Jornalista : Natalino Belo
Editór : Evaristo Soares Martins
